Олунньу 12 күнүгэр Баатаҕай орто оскуолатын 6 кылааһын үөрэнээччилэригэр «Сахабыт тыла — бэйэбит тылбыт» диэн тиэмэҕэ «Күн» оҕолоро өссө биир айар түмсүүнү тэрийэн ыыттыбыт.
Бастаан айар түмсүүбүтүн Леонид Попов суруйбут хоһоонун «Таптыыбын сахам сирин» нуучча уола Руслан Игнатьев уу сахалыы доргуччу ааҕан иһитиннэрдэ. Саха оҕолоро олус диэн сөхтүлэр уонна үөрэ иһиттилэр. Руслан Игнатьев биһиги оскуолабытыгар 5 «А» кылааска ситиһиилээхтик үөрэнэр. Кини олус үчүгэйдик саахыматтыыр, дуобаттыыр, тустуук бэрдэ уонна «Күн» түмсүү актыыбынай кыттыылааҕа.
Онтон салгыы Семён Андреевич Новгородов туһунан иһитиннэриини оҥордубут. Кылгас ыйытыылар нөҥүө оҕолор былыргы олох-дьаһах, тыл кистэлэҥнэрин, сайдыытын уонна улуу дьоннорбут тустарынан төһө билэллэрин-ааҕалларын, интириэһиргииллэрин чинчийэн, кэтээн көрдүбүт.
Дьэ, онтон хомус тыаһыгар уйдаран сахалыы хоһооннору аахтыбыт. Салгыы «Оһуор ойуу» оонньуу нөҥүө күрэхтэри ыыттыбыт, оһуокайдаан да ыллыбыт.
Биһиги бу тэрээһиммитигэр оскуолабыт дириэктэрэ Людмила Николаевна Григорьева уонна иитэр үлэҕэ дириэктэр солбуйааччыта Татьяна Сергеевна Смирнова, учууталбыт Светлана Николаевна Данилова ыалдьыттаатылар. Кинилэр кэлэн сэргээбиттэригэр, болҕойон истибиттэригэр, биһигини өйөөбүттэригэр ис дууһабытыттан махтанабыт.
Онон бүгүн эмиэ сахалыы тыыннаах биир бэртээхэй күн буолан ааспытыттан астынныбыт уонна дуоһуйа сынньанныбыт.
Сахам тыла — улуу баайбыт буоларын оҕолор биһиги өйдүөхтээхпит. Ийэ тылбыт — биһиги дьолбут, киһи буолар кэскилбит буоларын билиэхтээхпит дии санаанан бүгүҥҥү күнүм сонунун түмүктүүбүн.
Алина Ерусланкина, Баатаҕай орто оскуолатын 7 «В» кылааһын үөрэнээччитэ.
keskil14.ru