Бүгүн, кулун тутар 17 күнүгэр национальнай бибилэтиэкэҕэ «Ийэ тыл» форум чэрчитинэн «Оҕо сахалыы ааҕыытын аныгы ньыманан тэрийии» диэн стратегическай сессия ыытылынна. Тэрээһин сахалыы ааҕыыны көҕүлүүр саҥалыы көрүүлээх, көхтөөх дьону түмэн, «Ааҕар Саха сирин» ситимин улууска, нэһилиэккэ тэрийэн, оҕоҕо-ыччакка сөптөөх сэргэх бырайыактары үлэлэтэр сыаллаах ыытылынна. Бу түһүлгэҕэ бибилэтиэкэ, хаһыат, сурунаал, кинигэ кыһатын үлэһиттэрэ, саха тылын учууталлара, худуоһунньуктар, кинигэ ааптардара кыттыыны ыллылар.
Билэрбит курдук, аныгы кэмҥэ төрөөбүт тылынан оҕону аахтарыы олус уустук дьарык. Аныгы оҕо аахпат, төрөөбүт тылынан кэпсэтэрэ, бэл, тыа сиригэр, лаппа аҕыйаата. Оҕо тылын саппааһа аҕыйаан, үксүн нуучча, омук тылын кыбытан туттар. Кыра эрдэҕиттэн гаджеттарга олоруута, дьиэ кэргэн иһигэр ааҕыы уонна кэпсэтии суох буолуута — оҕо ийэ тылын толору баһылыырыгар улахан мэһэйдэри үөскэтэллэр.
Оҕону, ыччаты ханнык ньыманан сахалыы аахтарабытый? Сахалыы хаһыаты, сурунаалы ааҕыыны оскуола, нэһилиэк, улуус таһымыгар хайдах тэрийэбитий? Сахалыы кинигэ атыытын улуустарга тэрийэр ханнык ньымалар баалларый? Ааҕыыга доҕуһуол буолар ньымалары (испэктээк, комикс, аниме, хартыына, киинэ о.д.а.) хайдах туһанабытый? Бу туһунан түһүлгэ кыттааччылара бүгүн санааларын үллэһиннилэр, бэйэлэрин уопуттарын кэпсээтилэр.
Кыттааччылар сессия устата хамаанданан олорон аныгы оҕо уобараһын толкуйдаатылар, кини тоҕо аахпатын быһаардылар. Ааҕар баҕатын уһугуннарар ньымалары толкуйдаан бырайыак оҥорон ону көмүскээтилэр.
Бырайыактарга ааҕар бэстибээллэри ыытыы, төрөппүттэри кытыннарыы, комикс, иллюстрациялары туттан аахтарыы ньымаларын туһаныы, ааҕыыны сыанаҕа туруоруу, ааҕыыны успуорду кытта дьүөрэлээһин уо.да.а интэриэһинэй этиилэри киллэрдилэр.
Виктория КОЛОДЕЗНИКОВА