«…Үөрэнэртэн, саҥаттан саҥаны билэртэн ордук үөрүү суох…”
А.П. Васильева.
Саха сирин ийэлэрин күнүн көрсө РСФСР норуотун үөрэҕириитин туйгуна, нуучча тылын уонна литературатын учуутала, наставник, улуустааҕы үөрэх салалтатын общественнай методиһа, инспектора, Саха сирин дьахталларын Х съеһин дэлэгээтэ, Таатта улууһун Бочуоттаах олохтооҕо, Саха Өрөспүүбүлүкэтин педагогическай энциклопедиятыгар, оскуолабыт Бочуотун кинигэтигэр киллэриллибит кыраайы үөрэтээччи, историяны чинчийээччи, общественнай кэрэспэдьиэн Анна Петровна Васильева төрөөбүтэ 90 сылыгар анаан оҕолоро ийэлэрин сырдык аатын үйэтитэн, сүгүрүйэн, оскуолабытыгар дьоһун бэлэҕи ууннулар. Үөрүүлээх чааска оҕолоро бары кэлэн, истиҥ-иһирэх тылларын эттилэр, «бу ыскамыайка оҕолору, учууталлары, төрөппүттэри түмэ, сомоҕолуу турдун», — диэн алгыс тылларын анаатылар.
Анна Петровна учуутал идэтигэр, үөрэхтээһин эйгэтигэр олоҕун анаан үлэлээбитин сыаналаан, үйэтитэн, оҕолорун көмөтүнэн оскуолабытыгар 2017 сыллаахха нуучча тылын, литературатын кабинета саҥардыллыбыта уонна анал истиэндэ оҥоһуллан, оскуолабыт биир кэрэ, үйэлээх миэстэтэ буолар.
РФ үтүөлээх учуутала, Таатта улууһун Бочуоттаах олохтооҕо Анна Петровнаҕа анаммыт «Дьоҥҥо анаммыт олох» ахтыы-кинигэ кыттыгас ааптара К.А. Хатылыкова улууспутугар Учуутал скверэ тутуллуон баҕарарын эттэ. Нэһилиэкпит баһылыга Е.И. Павлов, улууспут үөрэҕин салаатын начальнига В.В. Кривошапкин эҕэрдэ тыл эттилэр. Егор Иннокентьевич Ксения Анисимовна этиитин өйүүрүн биллэрдэ.
«Наһаа үчүгэй… дьон туһугар үрүлүйэ үлэлиир, үөрэр-көтөр…», — диэн Анна Петровна этиитэ үөрэх-сайдыы суолунан барыбытын түмэ тарда, сырдыкка, кэрэҕэ сирдии турдун!
Галина ИМ, «Ситим» эдэр кэрэспэдьиэннэр кулууптарын салайааччы,
Ытык Күөл, Таатта.