Сииттэбит нэһилиэгэр алаһа дьиэ араҥаччыта, иэримэ дьиэ иэйэхситэ буолбут икки Герой ийэлэр үлэ-олох үөһүгэр олорон ааспыттара. Кинилэр оҕолоро нэһилиэкпитигэр, өрөспүүбүлүкэ араас муннуктарыгар төһүү күүс буолан айа – тута олороллор. Марфа Степановна Новогородова сиэнин, Евдокия Ивановна Охлопкованы кытта кɵрсɵн кэпсэттим. Кини А.В.Аргунов аатынан Сииттэтээҕи норуот айымньытын дьиэтин уус –уран салайааччытынан үлэлиир.
— Евдокия Ивановна, эбэн Марфа Степановна туһунан кылгастык билиһиннэр эрэ.
— Мин эбэм, Марфа Степановна 1933 сыллаахха тохсунньу 1 күнүгэр уруккута Нам оройуонун Сииттэ нэһилиэгэр холкуостаах дьиэ кэргэнигэр үһүс оҕонон күн сирин кɵрбүтэ. Ийэтэ, Екатерина Петровна Новгородова (Макарова) Чурапчыттан тɵрүттээх . Бииргэ төрөөбүт алтыалар. Аҕата, Степан Васильевич Новгородов Сииттэ төрүт олохтооҕо. Эбэм, 1953 сыллаахха эһэбэр Григорий Николаевич Кривошапкиҥҥа кэргэн тахсар. Эһэм сорсуннаах булчут этэ. Кинилэр 10 оҕоҕо күн сирин көрдөрбүттэрэ. Эбэм, сытыары сымнаҕас майгылаах, ханнык да үлэттэн куттаммат улэһит киһи этэ. Кини оҕо сааһа сэрии ыар сылларыгар ааспыта. Эбэм, 11 сиэн, 3 хос сиэн тапталлаах эбэтэ буолар дьолу билэн бу күн сириттэн барбыта.
— Нэһилиэкпитигэр ытык ийэлэргэ аналлаах үлэлэр ыытыллалларын билэбит. Чуолаан, Герой ийэлэри үйэтитиигэ нэһилиэккэ туох үлэлэр барбыттарын билиһиннэриэҥ?
— Сииттэбит нэһилиэгэр икки Герой ийэ Мария Иннокентьевна Сивцева, Марфа Степановна Новгородова олорон ааспыттара. Кинилэр ааттарын үйэтитиигэ нэһилиэк салалтата, төрөппүт оҕолоро, сиэннэрэ үлэ бөҕөтүн ыыттылар, инникитин да былааҥҥа бааллар. Ол курдук, мин эбэм туһунан өрөспүүбүлүкэтээҕи «Ийэҕэ махтал» диэн кинигэҕэ киирбитэ. Бу кинигэ, 2022 с. Саха Өрөспүүбүлүкэтигэр Ийэ сылыгар ананан тахсыбыта. Өрөспүүбүлүкэ герой-ийэлэригэр аналлаах «Большая семья» диэн кинигэҕэ киирбитэ. Нэһилиэкпитигэр герой-ийэлэргэ аналлаах Ийэ скверэ оскуола үөрэнээччилэрин (сал. Сидорова А.Г.) бырайыагынан оҥоһуллубута Ханнык баҕарар киһи ийэтин сүрэҕэр чугастык тутар. Ити үлэлэри кэнчээри ыччаттар, оскуолабыт оҕолоро ыыталларыттан астынабын уонна тутатына олоххо киирбитинэн үөрэбин. Мин эбэбинэн киэн туттабын, кини олоҕун биһиги, төрөппүт оҕолоро, сиэннэрэ, хос сиэннэрэ салгыыбыт, эбэбит аатын үрдүктүк тутарга кыһаллабыт.
— Кэпсээниҥ иһин махтал!
Дайаана НИКОЛАЕВА, 11 кылаас, В.Е. Колмогоров аатынан Сииттэ орто оскуолата