Билигин ыччат айарыгар-тутарыгар бары кыах барыта баар. Оҕо талаанын сөпкө туһаннаҕына, олоххо элбэҕи ситиһиэн сөп. Уонна кыратыттан бэйэҥ кыаххын билэ улааттаххына, инники олоххор бэлэмнээх буоларыҥ бу биллэр суол.
Алина Захарова сааһа 14-дэ. Кини Таатта улууһун Игидэй орто оскуолатын 8 кылааһын үөрэнээччитэ. Алина оҕо эрдэҕиттэн ас астыырын туохтааҕар да ордорор. Биир үтүө күн кинини ийэтэ торт астыырга үөрэтэр кууруска суруттарбыт. Мантан ыла кыыска букатын атын олох саҕаламмыт.
Ол туһунан Алина бэйэтэ кэпсиир:
— Мин бастаан саныыр этим, бу үөрэнэр бириэмэбэр туох эмит дохуот киллэрэн, бэйэбэр харчы оҥостубут киһи диэн. Уонна биир баҕа санаалааҕым, ол онтукпун бэйэм кыахпынан наһаа ситиһиэхпин баҕарарым.
Ас астыырбын отой кырабыттан ордоробун. Дьиэбэр кыралаан астыырым. Онтон ийэм торт астыырга үөрэтэр куурустарга суруттаран, онно үөрэммитим, уопутурбутум.
Аан бастакы тортпун дьоммор астаан амсаппытым. Наһаа кыһаллан туран астаабытым, сатаммыта, ол гынан баран киэргэтии өттүн өссө таба илигим. Дьиэ кэргэним астыммыта, маҥнайгы саҕалааһыммын өйөөбүттэрэ.
Онтон сыыйа-баайа үөрэнэн, тортарбын астаан, аны дьоҥҥо атыылыыр буолбутум.
Ордук табыллан сакалаат торда табыллар. Киэргэтиитигэр араас кэмпиэти, сакалааты, бэчиэнньэни, зефир оҥорон туттабын.
Астыырбар туттар бородууксуйабын, киэргэтиини Ытык Күөлтэн, Аллараа Бэстээхтэн, Дьокуускайтан сакаастаан ыллаттарабын.
Элбэх торду астаан кэллим. Сакаастыыр дьон син баар. Өссө эбии бу кондитер өттүнэн сайдыахпын баҕарабын.
Саҥа саҕалааччыларга, бастаан ылсыбыт дьыалаҕыт сатаммат буоллаҕына, тута хомойбоккутугар, быраҕан кэбиспэккитигэр баҕарабын. Хаһан баҕарар киһи бэйэтэ саҕалыыр дьыалата түһүүлээх-тахсыылаах буолар, ону уруок оҥостон, сыыһаларгытын бэлиэтээн, инникигит диэки баран иһиэххэ дии саныыбын. Аны торт астыыр дьон, киһи хас астаатаҕын аайы, уопутуран иһэр буолар. Уонна, кырдьыктыы, бу дьарыгы сөбүлүүр буоллаххына, ис дууһаҕыттан кыһаллан, арыллан туран ылсар эбит буоллаххына, табыллар эбит диэн түмүккэ кэллим.
Онон торт астаан бэйэтигэр дохуот киллэриэн баҕарар оҕолорго — ситиһиилэри, тулууру эрэ баҕарабын! Уонна чугас дьонуҥ, доҕотторуҥ өйөбүллэрэ хаһан баҕарар эйигин кынаттыыр буолар.
Онтон Алина били ыра санаатын туһунан ыйыппыппар, ол баҕа санаата туолбутун эттэ. Кыыс торт оҥорон атыылаан, эбии харчы киллэрэн, бэйэтигэр саҥа Айфон телефон ылыммыт эбит. Дьэ, маладьыас диэтэҕиҥ.
Онон, оҕолоор, хайа баҕарар туруоруммут сыалгытын тиһэҕэр тиэрдэр буолуҥ. Ылсыбыт саҕалааһыҥҥыт үтүө түмүктээх буоллун. Билигин эдэр киһи талаанын арыйарыгар элбэх суол баар. Ол ону эн бэйэҥ таба тайаныаххын эрэ наада. Кытаатыҥ!
Маны таһынан Алина иллэҥ кэмигэр блогер быһыытынан бэйэтин холонон көрөр. Бу бэйэтин дьарыгыҥ туһунан видеоролик устан оҥорбутун манна таһаарабыт.
Суруйда Анна СЛЕПЦОВА.