Мин быйыл оскуолабын бүтэрэн, В.А. Вонгродскай аатынан медицинскэй колледжын устудьуона буоллум. Сиэстэрэ идэтигэр киирдим. Балаҕан ыйын 1 күнүттэн үөрэхпит саҕаланна.
Үөрэх дьылын саҕалыыр үөрүүлээх линейкэҕэ колледжпыт дириэктэрэ Дмитрий Афанасьевич Алексеев эппитинэн, быйыл колледжпыт үбүлүөйдээх 120 сыла. Дмитрий Афанасьевич бу күнтэн ыла биһиги маҥан халааппытын, колпакпытын кэтэн, бэйэбитин ыраастык туттан, баттахпытын хомунан сылдьыахтаахпытын, биир да паараны көтүппэккэ, чиҥник үөрэниэхтээхпитин туһунан күүскэ тоһоҕолоон эттэ. Тоҕо диэтэххэ, доруобуйа харыстабылын орто звенота – сиэстэрэлэр, биэлсэрдэр – бу биир саамай тутаах специалистар буолан, улахан эппиэтинэһи сүгэллэр.
«Маны таһынан, целевой миэстэнэн үөрэнэ киирбит оҕолор, үөрэххитин бүтэрдигит да тута, целевойдаах улуускутугар үлэлии бараҕыт. Барыахпытын баҕарбаппыт, үлэлиэхпитин баҕарбаппыт, атын сиргэ барыам этэ диэн кэпсэтиилэр суох буолуохтаахтар», – диэн эттэ.
Медицинскэй колледж устудьуона буоламмын биир улахан эппиэтинэһи сүктүм. Ол курдук медколледж амбассадора буоллум. Биһигини кураторбыт Анна Владимировна Андреева салайар. Ол аата биһиги медколледж ыытар үлэтин, олоҕун дьоҥҥо-сэргэҕэ билиһиннэрэр, көрдөрөр дьон буолабыт. Бастакы улахан тэрээһиммит – «Лидер. Спикер. Медицина» интенсив үөрэххэ кыттыыны ыллыбыт. Манна биһиэхэ доруобуйа харыстабылын сыаннастарын туһунан, ону дьоҥҥо хайдах сатаан сөпкө тиэрдэргэ үөрэттилэр, интэриэһинэй лекциялары иһиттибит.
Онтон балаҕан ыйын 8 күнүгэр колледжпытыгар «Клиническая и профилактическая медицина» диэн саҥа кластер арыллыытыгар кыттыыны ыллыбыт. Бу улахан тэрээһиҥҥэ өрөспүүбүлүкэбит Ил Дархана Айсен Сергеевич Николаев кыттыыны ылла.
Бу кластер «Молодёжь и дети» национальнай бырайыак «Профессионалитет» диэн федеральнай бырайыак иһинэн үлэҕэ киирбит. Колледжпыт 120 үбүлүөйдээх сылын биир улахан ситиһиитэ буолар. Саҥа кабинеттарга устудьуоннар акушерскай дьыаланы, суһал көмөнү уонна цифровой технологиялары стоматологияҕа үөрэтиэхтэрэ. Идэбит үөрүйэхтэрин сайыннарарга, эрчийэргэ сэттэ анал зона баар. Саҥа кабинекка сайдыылаах услуобуйаҕа үөрэнэр буолбуппут олус үчүгэй. Инники баһылыахтаах идэбитигэр сатабылбытын сайыннарарбытыгар улахан кыах баар буолла.
Сайаана СОЛДАТОВА, В.А. Вонгродскай аатынан
медколледж I куурсун устудьуона, сд26-5 группа, Дьокуускай