Саамай күүтүүлээх бырааһынньыгынан Н.О. Кривошапкин аатынан Өймөкөөн орто оскуолатыгар сылын аайы ыытыллар «Идэһэ киэһэтэ» буолар. Быйыл эмиэ сэтинньигэ кылаастар араас норуоттар астарын астаан бэлэмнэнэн, сүрдээх тэрээһиннээхтик кытыннылар. Астарын атыылыыр, көрдөрөр сирдэрин бары киэргэттилэр,оҕолор көстүүм оҥостон кэттилэр.
Ол курдук, быйыл оскуолаҕа киирбит оҕолор Франция дойдутун дьоно буоллулар. Иккис кылаастар мексиканец буолан кытыннылар. Үһүстэр KFC атыыһыттара буолан атыылаабыттара. Төрдүстэр Армения дойдутун билиһиннэрбиттэрэ. Бэһистэр Бурятияны көрдөрбүттэрэ. Алтыстар Россия аһын-үөлүн тардыбыттара. Сэттистэр Саха сирин бастыҥ аһылыгын тардан күндүлээбиттэрэ. Ахсыстар Индия итии дойдутун сырдаппыттара. Тохсустар Корея аһын-үөлүн тартылар. Онустар Италия аһын астаан үөртүлэр. Уон бииристэр Япония куукунатынан дьон-сэргэ болҕомтотун тартылар.
Бары бэлэмнэнэн, остуолларын дьүүллүүр сүбэ иннигэр көмүскээн, аукциоҥҥа биир “Оригинальнай аһы” туруоран атыылаатылар. Дьүүллүүр сүбэ түмүгэ маннык буолла: алын сүһүөх кылаастарга I миэстэҕэ I уонна IV кылаастар, II — II кылаас, III — III кылаас буоллулар. Орто сүһүөххэ I миэстэ VI, II — V, III — VII кылаастар таҕыстылар. Үрдүкү кылаастарга VIII, X, IX кылаастар бириистээх миэстэлэргэ тигистилэр.
Түмүккэ, бары астынан, дьиэлэригэр өттүк харалаах тиийдилэр.
Наяна КОРЯКИНА, Н.О. Кривошапкин аатынан Өймөкөөн орто оскуолатын V кылааһын үөрэнээччитэ.