Олунньу 3 күнүгэр Ороһутааҕы Уйбаан Ороһуунускай аатынан олохтоох библиотекаҕа эмиэ биир сэргэх тэрээһин буолан ааста. Үөһээ Бүлүүлэр биир киэн туттар кыыспыт Любовь Борисова «Кэрэни көрбүт» («Не хороните меня без Ивана») киинэтин бу күннэргэ бүттүүн республика, тас да дойдуларга сөҕө-махтайа, кэрэхсии көрдүбүт.
Ороһу нэһилиэгин бочуоттаах олохтооҕо, педагогическай үлэ ветерана, норуот маастара Наталья Александровна Кривошапкина киинэ сүрүн геройун, Иван Попов сыдьаана буоларын нэһилиэнньэ киэҥ араҥата, оҕолор улаханнык билбэт-көрбөт да этибит. Онтон, бу киинэни көрөн баран, Саха сирин ойуулуур-дьүһүннүүр искусствотын төрүттээччитин Иван Васильевич Попов олоҕун, айар үлэтин умсугуйбут дьон аҕыйаҕа суох буолуохтаах. Онтон сиэттэрэн, бу күн Наталья Александровнаны, урууларын-аймахтарын туһунан нэһилиэнньэҕэ, туһулаан оҕолорго сырдатарыгар көрдөспүппүтүн быһа гыммакка матырыйаал бөҕөтүн илдьэ кэлэн олус истиҥник сэһэргээн барда.
Худуоһунньук, этнограф Иван Попов 19 үйэҕэ Таатта улууһугар кэлэн олохсуйбут протерией Дмитриан Дмитриевич Поповтан силис тардар эбит. Ыраахтааҕы саҕана церковь оскуолатыгар оҕолору мунньан үөрэтэр, бэйэтэ учебник оҥорор, сахалыы отой билбэт киһи кэлэн, дьаныһан туран саҥа тыллары сурунан, ис хоһоонун ырытан, Пекарскай тылдьыта тахсарыгар кыттыспыт, саха тылын сайдыытыгар биир сүрүн кылааты киллэрсибит дьонтон биирдэстэрэ буолар.
Наталья Александровна кэлбит ыалдьыттарга бэйэтин төрүччүтүн, Иван Попов айар олоҕун туһунан олус элбэҕи билиһиннэрдэ, сырдатта. Кини бэйэтэ эмиэ удьуор утумнаан илиитигэр олус талааннаах: улууска, республикаҕа ыытыллар быыстапкаларга өрүү бириистээх миэстэҕэ тиксэр. Ону таһынан норуот педагогикатын түмэлигэр турар, 19-с үйэтээҕи сүктэр кыыс атын симэҕин реконструкциялаабыта биир улахан улэ буолар.
Тэрээһин кыттыылаахтара «Саха» НКИХ архыыбыттан Иван Попов айар үлэтин туһунан тэттик сюжеты көрдүлэр, киинэ тула санаа атастастылар.
Түгэнинэн туһанан, Наталья Александровнаҕа уонна бары кэлбит ыалдьыттарга библиотека аатыттан барҕа махталбытын тиэрдэбит!
Жанна Иванова, Уйбаан Ороһуунускай аатынан олохтоох библиотека библиотекара, Ороһу.