Хотугу дэгит көрүҥэ «Манчаары оонньууларыгар» 2005 сыллаахха киирбитэ уонна оччолорго үс эрэ көрүҥҥэ зачет биэрэрэ. Онтон 2017 сыллаахтан биирдэ толору биэс көрүҥҥэ ыыттыллар буолбута. Быйылгы Тааттаҕа ыытылла турар күрэс төрүт көрүҥнэригэр «Манчаары оонньууларыгар» хотугу дэгит күрэскэ уопсайа 80 күрэстэһээччи баар, сааһынан биэс бөлөххө араараллар: эдэр оҕолор (кыргыттар уонна уолаттар), кэрэ аҥаардар уонна эр дьоннор, эр дьон бэтэрээннэр. Уопсайа сааһынан араарыыга 16-лыы кыттааччы баар.
Аркааны быраҕыыга саҥа чыпчаал ситиһии олохтонно
Аркаан быраҕыытыгар кэрэ аҥаардарга өрөспүүбүлүкэҕэ саҥа рекорд олохтонно. Үөһээ Бүлүүттэн Валентина Борисова 140 аркааны быраҕан бэһис тус көрдөрүүтүн тупсарда. Ол иннинэ өрөспүүбүлүкэҕэ чыпчаал ситиһии — 112.
Анаабыр хоһуун уола Вадим Туприн күрэс төрүт көрүҥнэригэр «Манчаары оонньууларыгар» хотугу дэгит күрэскэ уолаттарга үс төгүллээх чөмпүйүөн аатын сүктэ. От ыйын 10 күнүгэр, оруобуна төрөөбүт күнүгэр, аркааны быраҕыыга үһүс көмүс мэтээлин ылбыта.
Сүгэ быраҕыытыгар оҕолорго Үөһээ Бүлүү эдэр спортсменнара күннээтилэр
Хоту дэгит көрүҥ үһүс түһүмэҕэр сүгэ быраҕыытыгар Үөһээ Бүлүү спортсменнара тэҥнээхтэрин булбатылар. Ол курдук, эдэр кыргыттарга И.Н. Бараахап аатынан Үөһээ Бүлүүтээҕи 1 №-дээх оскуолатын 10 кылааһын үөрэнээччитэ Люба Михайлова 91,50 көрдөрүүлээх маҥнайгы миэстэни ылла. Уолаттарга эмиэ Үөһээ Бүлүүттэн сылдьар Евгений Николаев бастаата, кини көрдөрүүтэ — 134.
Сүгэ быраҕыытыгар чөмпүйүөн Люба Михайлова хотугу дэгит күрэһинэн дьарыктаммыта сэттис сыла. «Сүгэни быраҕыыга саамай наадалааҕа долгуйуо суохха наада уонна илииҥ күүстээх буолуохтаах. «Манчаары оонньуулара» тус бэйэбэр үчүгэйдик аастылар. Хомойорум диэн аркаан быраҕыытыгар кыранан хааламмын, үһүс миэстэни ылбытым«, — диэн кини этэр.
Наартаҕа ойууга Саха сирин саҥа чыпчаал ситиһиитэ олохтонно
Наартаҕа ойууга саҥа көрдөрүүнү Өймөкөөн хамаандатын бэрэстэбиитэлэ, ХИФУ физкультура институтун 4 кууруһун устудьуона Георгий Софронов олохтоото. Кини наартаны 1140 ойдо! Эрдэ бэйэтин көрдөрүүтүн 29 ойуунан куоһарда! Онтон 2021 с. бастакы кыттыбыт «Манчаары оонньууларыттан» ити чыпчаалын төһө эмит элбэх ойуунан ситтэ. Кини онно уон сэттэ саастааҕар оҕолорго 720 наартаны ойон турар.
Онтон кэрэ аҥаардарга наартаҕа ойууга Нерюнгри спортсменката Илона Прудникова эмиэ саҥа чыпчаалы олохтоото. Кини наартаны 454-тэ ойон чөмпүйүөн үрдүк аатын ылла.
Бэлэмнээтилэр Снежана Яковлева, Яна Гузаирова.
Устуу, таҥыы Авдей Неустроев.
«Кэскил» оҕо пресс-киинин эдкордара.
keskil14.ru