Хос эһэм Николай Афанасьевич Прохоров 1926 сыллаахха ыам ыйын 22 күнүгэр Амма улууһун I Наахараҕа төрөөбүт. 1934 сыллаахха Олом Күөл 4 кылаастаах оскуолатыгар үөрэнэ киирбитэ. 1938 сыллаахха бүтэрэн баран, салгыы Алтан оскуолатыгар үөрэммитэ. 1940 сыллаахха алта кылаас үөрэхтэммит.
Хос эһэм 1944 сыллаахха Аҕа дойду Улуу сэриитигэр ыҥырыллан, Белорусскай фроҥҥа санитарнай батальоҥҥа сулууспалаабыт. Сэриини Берлин куоракка түмүктээбит. «Варшаваны босхолооһун иһин», «Берлини ылыы иһин», «Германияны кыайыы иһин» мэтээллэрдээх.
Сэрииттэн 1946 сыллаахха эргиллибит. Холхуоска, сопхуоска бухгалтерынан үлэлээбит. Хос эбэбин Софья Ильиничнаны кытта сэттэ оҕоломмуттара. 1983 сыллаахха олохтон туораабыта.
Хос эһэм саамай күндү мала – быраатыгар Василийга 1945 сыллаахха Германияттан ыыппыт хаартыската. Бу хаартыска биһиги дьиэ кэргэҥҥэ олус күндү. 80 сыл, төрдүс көлүөнэҕэ тиийэ хараллан кэллэ.
Бу хаартыскаттан хос эһэм миэхэ мичээрдиир. Уоттаах сэрии саҕана эдэркээн даҕаны эбит!
Хос эһэбиттэн хаалбыт мас хоппо баар. 1957 сыллаахха хос эһэбэр табаарыһа бэлэхтээбит.
Урут калькулятор оннугар суоту тутталлар эбит. Бу суотунан бухгалтер идэлээх хос эһэм элбэх дьон хамнаһын, харчытын аахтаҕа. Уонна бу холкуостаахтар харчыларын уктан аҕалар суумката.
Хос эһэм Николай Афанасьевич, хос эбэм Софья Ильична оҕо-уруу төрөтөн, билигин кин ыччаттар баарбыт. Хос эбэм баара буоллар 90 сааһын туолуо этэ. Кыайыы 80 сылын көрсө уонна 90 сааһыгар анаан ыам ыйын 3 күнүгэр хос эбэм аатынан Иистэнньэҥнэр күрэхтэрин тэрийэн ыытаары бэлэмнэнэ сылдьабыт.
Хос эһэм туһунан таһаарбыт кыракый кинигэм «Чуораанчык» сурунаалга бэчээттэммитэ уонна салгыы улахан электроннай кинигэ буолан таҕыста https://new.nlrs.ru/open/124927
Ильяна-Ай Куо, Нина Николаевна Ноговицыналар,
«Чуораанчык» оҕо саада, Эмис, Амма