(остуоруйа)
Арай биирдэ кырачаан чыычаах күөрэгэй улахан тиити талан, уйаланан, сымыыттаабыт. Ону Саһыл обургу истэ охсон, сарсыарда аайы кэлэн маныыр буолбут. Харыйа анныгар туран маннык диэбит:
— Күөрэгэйчээн, биир сымыытта миэхэ биэр! Биэрбэт түгэҥҥэр, тиити суулларыам да, уйаҕын ыһыам.
Күөрэгэй куттанан сымыытын биэрээхтээбит. Аныгыскы күнүгэр Саһыл эмиэ кэлэн модьуйбут:
— Күөрэгэй, сымыытта биэр! Миэхэ төрөппүттэрим ыалдьыттыы кэллилэр. Сымыыттаах миин буһаран күндүлүөм. Биэриэҥ суоҕа да, олорор маскын суулларыам, уйаҕын ыһыам!
Итинник биирдии биирдии сымыытын былдьаан, күөрэгэй биир эрэ сымыыттаах хаалбыт.
Саһыл обургу кэлбитэ эрэ баар:
— Күөрэгэй, сымыытта биэр! Миэхэ эдьиийим ыалдьыттыы кэллэ. Сымыытынан күндүлүөм этэ.
— Суох, саһыл, аны биэрбэппин, — диэбит күөрэгэй. — Биир эрэ сымыыттаах хаалаахтаатым.
— Сымыыт суох диигин дуо, оччотугар бэйэҕин сиэн кэбиһиэм! – диэн куттаабыт Саһыл.
Күөрэгэй барахсан уйатыгар ытыы олорбут. Ол кэмнэ икки кыыс оҕо тыаҕа оонньуу сылдьыбыттар. Чыычаах ытыырын истэн, чугаһаан ыйыппыттар:
— Күөрэгэйчээн, тоҕо ытаатыҥ?
— Хайдах ытыам суоҕай?- диэн саҕалаабыт чыычаах.- Миигиттэн Саһыл арахпакка эрэйдээтэ. Кутту-куттуу күн аайы кэлэн, сымыыппын барытын былдьаата. Биир эрэ сымыыттаах хааллым.
— Оо, Күөрэгэйчээн барахсан, ытыыргын тохтот, — диэбиттэр кыргыттар. – Саһыл обургу эйигин куттаан албыннаабыт дии. Хантан кини харыйаны суулларан, уйаҕын ыһыай. Дьэ, биьиги албынчыгы кэһэтиэхпит. Билигин ыппытын хаар анныгар кистиэхпит. Онтон Саһыл кэлэн, сымыыт көрдөөтөҕүнэ, эн маннык диэр: «сымыытым суох, талах кэннигэр куурусса кистээбитим. Ону ыл.»
Инник диэн баран кыргыттар барбыттар. Ол кэннэ саһыл номнуо бу кэлэн турар эбит:
— Күөрэгэй, сымыытта биэр миэхэ! Ийэлээх балтым кэлэ сылдьаллар. Сымыыт буһаран күндүлүөм этэ.
— Оо, Саһыл, сымыытым уонна суох, — диэбит чыычаах.- Барытын эйиэхэ биэрбитим!
— Суох буоллаҕына, бэйэҕин сиэм, күөрэгэй!
— Суох, көрдөһөбүн, сиэмэ!- диэхтээбит чыычаах.- Кууруссаны ыл. Ол талах анныгар кистээбитим.
Саһыл үөрүөҕүн үөрэн, салбанан ыла-ыла талахха ыстаммыт. Ол турдаҕына ыт ойон тахсыбыт уонна Саһылы эккирэтэн, түүтүн бурҕаппыт, кэһэтиэҕин кэһэппит. Маннык күөрэгэй барахсан иҥсэлээх Саһылтан быыһаммыт, тыыннаах хаалаахтаабыт. Эһиилигэр эмиэ уйаланан, сымыыттаан, кырачаан чыычаахтарын улаатыннартаабыт.
Арылхан КОКАРЕВ,
IV кылаас,
Сунтаар 1-кы №-дээх орто оскуолата,
Сунтаар