Дойду үрдүнэн буола турар Анал байыаннай дьайыыга элбэх хоһуун санаалаах эр бэрдэрбит, ыччатарбыт кэлэр көлүөнэ туһугар кыттыыны ыла сылдьаллар. Чурапчы улууһуттан төрүттээх анал байыаннай дьайыы кыттыылааҕын, биир дойдулаахпыт, “Эр санаа” уордьан кавалера, Николай Николаевич Романов туһунан кылгастык сырдатыахпын баҕарабын.
Николай Николаевич Романов 1980 сыллаахха бэс ыйын 3 күнүгэр Чурапчы оройуонун Соловьев нэһилиэгэр төрөөбүтэ. Николай Николаевич уонна Парасковья Дмитриевна Романовтар элбэх оҕолоох дьиэ кэргэҥҥэ бастакы күүтүүлээх уол оҕонон күн сирин көрбүтэ. Ыал улахан уола буолан төрөппүттэригэр улахан көмөлөөх киһи, тыа олоҕун үлэтин сатыы-кыайа улааппыта.
Кини кыра эрдэҕиттэн сэмэй, үөрэххэ тардыһыылаах, дьоҕурдаах. Ордук математика, биология, география биридимиэттэрин интэриэһиргиирэ, ону таҺынан олус үчүгэйдик ыллыыра. 1997 сыллаахха оскуолатын бүтэрэн М.К.Аммосов аатынан Дьокуускайдааҕы Судаарыстыбаннай университетка үөрэнэ киирэр. 2004 сыллаахха университеты бүтэрэн географ идэтин баһылаан төрөөбүт оскуолатыгар Мырылаҕа учууталынан үлэлии кэлбитэ.
Олоҕун тухары куруутун үлэ үөһүгэр сылдьыбыта. Дойдутугар, үлэтигэр бэриниилээх буолан тарбахха баттанар салайааччы, түмээччи быһыытынан сыаналанара. Кэнники сылларга Нам улууһун салалтатыгар үлэлии сылдьан дойду туһугар туруулаһар сыаллаах көҥүл өттүнэн тылланан тохсунньу ый 2023 сылыгар Анал байыаннай дьайыыга барбыта. Хомойуох иһин балаҕан ыйын Николай Николаевич дойдутун көмүскүү сылдьан олохтон туораабыта. Үс оҕо амарах аҕата, тапталлаах кэргэн бу кылгас олоххо чаҕылхайдык сулус курдук кэлэн, саалаахтан самныбат хорсун, дьоруойдуу быһыыта аатын ааттата туруоҕа.
Бу курдук дойдуга бэриниилээх хорсун дьоруойдары холобур оҥостобут, сыаналыыбыт. Анал байыаннай дьайыыга биһиги оскуолабыт элбэх выпускнига кытта сылдьаллар, хомойуох иһин, үгүстэр олохторун толук уурдулар. Кинилэргэ анаан оскуолабытыгар стенда арыйаары былаанныыбыт. 2025-2026 үөрэх дьылыгар бу стенданы олоххо киллэрэн выпускниктарбыт ааттарын үйэтитиэхпит. Ону таһынан оскуолабыт оҕолоро туора турбахха дьоруойдарбытыгар өйөбүл буолан куруутун араас акцияларга кыттабыт, холобур: “Письмо солдату”, “Талисман добра”.
Сивцева Кэскилээнэ, 10 кылаас, С.А. Новгородов аатынан Чурапчы орто оскуолата