«Якутия – Земля героев» бырайыак кэлэр кэнчээри ыччакка бэриниилээх буолуу олуга дии саныыбын. Бу күннэргэ «Якутия – Земля героев» кадровай бырагыраамма кыттааччыта, анал байыаннай дьайыылар кыттыылааҕа Анатолий Павлович Стручков С.Д. Флегонтов аатын сүгэр оскуолабытыгар кэлэн, үөрэнээччилэри, учууталлары биир өйгө-санааҕа түмтэ. Кини бырайыак үлэтэ эппиэтинэстээҕин, суолталааҕын, наадалааҕын туһунан өрө көтөҕүллүүлээхтик билиһиннэрдэ.
Оскуолабытыгар Анатолий Павлович Стручкову дойдубут Өрөгөй ырыатынан уруйдаан көрүстүбүт. Оскуолабыт киэн туттар дьонун туһунан стендэлэри, «Хорсун» байыаннай кулуубун иитиллээччилэрэ сырдаттылар, киэн тутта билиһиннэрдилэр. Оскуола иһинэн үлэлиир музей салайааччыта Е.С. Харитонова нэһилиэкпит өбүгэлэрин үтүө үгэстэрин, Аҕа дойдубутун көмүскээбит биир дойдулаахтарбыт хорсун быһыыларын туһунан сиһилии кэпсээтэ, нэһилиэкпит үлэһит дьонун сырдатта.
«Хорсун быһыы» аһаҕас уруок ураты суолталаахтык ааста. Үрдүкү сүһүөх кылаас үөрэнээччилэрэ анал байыаннай дьайыы бэтэрээниттэн Анатолий Павловичтан анал суолталаах ыйытыылары биэрэн, кини олоҕун уонна хорсун быһыыларын холобурунан оҕолор ыраас ыраларын сааһылаатылар. Связист уонна разведчик буоларга туох хаачыстыбалар ирдэнэллэрин, учууталлаабыт кэмнэрин уонна сэриигэ сылдьар дойдубут дьонугар суруктар, харысхаллар кырдьыктыы тиийэллэрин туһунан ыйытыыларга чопчу хоруйдары ыллыбыт.
Кэнчээри ыччакка анаммыт сүбэтэ, баҕа санаата кэлэр көлүөнэ Ийэ дойдуга бэриниилээх буолууга угуйда. Оҕолор бу уруоктан хорсун быһыы, тулуур, кыайыыга эрэл уонна Ийэ дойдуга бэриниилээх буолуу диэн өйдөбүллэр дириҥ суолтатын өйдөөтүлэр.
Анатолий Павловичка махталларын 8-с кылаас үөрэнээччитэ Эрсан Федоров ынах муоһуттан кыһан оҥорбут харысхалын туттаран, бэлэх ууммуттара, олус үөртэ.
Бу тэрээһин Хадаар нэһилиэгэ дойдубут кыайыытын, сырдык эрэлин туһугар биир санаалааҕын көрдөрдө.
Аристарх ЛУКИН, Х кылаас,
С.Д. Флегонтов аатынан Хадаар орто оскуолата, Чурапчы