Нэһилиэкпитигэр Улуу Кыайыы 80 сылын көрсө 80 Албан аат Күннэрин чэрчитинэн, «Биһиги дьиэ кэргэн Өйдөбүнньүгэ» бырайыак тэрээһинэ салҕанар.
Ол курдук муус устар 5 күнүгэр Аҕа дойду Улуу сэриитин кыттыылааҕа, биир дойдулаахпыт, хорсун сэрииһит, Албан Аат уордьан III истиэпэнин, Кыһыл сулус уордьаннар кавалердара, 4-с Украинскай фронт састаабыгар сэриилэспит Иван Васильевич Готовцев оҕолоро, сиэннэрэ, Суотту олохтоохторо Каратаевтар ыалдьыттаатылар. Дьиэ кэргэнинэн кэлэн Иван Васильевич Готовцев олоҕун туһунан кэпсээтилэр.
– Биһиги бүгүн манна кэлэн турарбытыттан, аҕабытын, эһэбитин ахтан-санаан ааһарбытыттан олус үөрэбит, долгуйабыт, – диэн эттилэр.
Уоттаах сэриигэ биир ыалтан ыҥырыллан барбыт аҕалара Константин, уола Илья, бииргэ төрөөбүтэ Николай Готовцевтар тустарынан оҕолоро, сиэннэрэ Готовцевтар аймах кэлэн кэпсээтилэр.
Арҕаа фронт хорсун буойуннара бииргэ төрөөбүт убайдыы-быраат Прокопий, Павел Готовцевтар тустарынан бүгүҥҥү көлүөнэ дьонноро Готовцевтар аймах билиһиннэрдилэр.
Кыайыы болуоссатыгар Г.В. Егоров, В.Д. Лонгинов пааматынньыктарыгар сибэкки дьөрбөтүн ууруутун сиэр-туома буолла. Тандатааҕы И.П. Готовцев аатынан түмэлгэ ахтыы киэһэтэ ыытылынна.
Хорсун саллааттар Хотуоһаптар уоттаах сэриигэ бойобуой суолларын туһунан билиҥҥи көлүөнэ аймах дьонун ахтыылара буолла, быыстапкалара турда. Оскуола оҕолоро, нэhилиэкпит олохтоохторо кэлэн сэргээн кыттыыны ыллылар.
Маны таһынан нэһилиэкпитигэр Улуу Кыайыы 80 сылыгар аналлаах хоһоон күрэҕэ ыытылынна. 10 улахан дьон, 3 оҕо кыттыыны ыллылар. Кинилэргэ махтал сурук уонна сэмэй бэлэх туттардылар.
Нэһилиэк олохтоохторо, эдэр ыччат, оскуола, уһуйаан оҕолоро кэлэн актыыбынай кыттыыны ылан сэрии кыттыылаахтарын туһунан элбэҕи биллилэр. Уонна өйдөбүнньүк түмүктэниэн иннинэ бары тэҥҥэ «Эйэ, дьол иһин», «День Победы» ырыалары ыллаатыбыт.
КИМ ДА УМНУЛЛУБАТ, ТУОХ ДА УМНУЛЛУБАТ!
Күндүүнэ ЕГОРОВА, VII кылаас,
М.Н. Готовцев аатынан Танда орто оскуолата, Уус Алдан
Снежанна Готовцева хаартыскалара, VIII кылаас