Олунньу 24 күнүгэр Үөһээ Бүлүү Хоро нэһилиэгэр Саха сирин спордун маастара Сергей Гаврильевич Слепцов бирииһигэр көҥүл тустууга оҕолорго аһаҕас республиканскай турнир буолан ааста. Бу күрэхтэһиигэ 6 ыйааһынынан барыта 130-ча бөҕөс Бүлүүттэн, Ньурбаттан уонна Үөһээ Бүлүүттэн кыттыыны ыллылар.
Биһиги, Хаҥалас оскуолатын оҕолоро, тренербыт Василий Васильевич Алексеев салалтатынан 12 бөҕөс буоламмыт күүспүтүн, кыахпытын холоннубут, төһө дьарыктаахпытын тургуттубут. Сытыы хапсыһыылар, күүстээх киирсиһиилэр кэнниттэн түмүкпүт маннык буолла: икки уол I миэстэ, үс тустуук — II миэстэ уонна үс бөҕөс — III-с миэстэни ыллыбыт. Ол аата 12 кыттааччыттан 8-һа илии тутуурдаах, наҕараадалаах төнүннүбүт.
Мин эмиэ 45 киилэттэн үөһээ ыйааһыннаахтарга туһуннум уонна иккис буолары ситистим. Уопсай түмүккэ Ньурба оройуона маҥнайгы миэстэҕэ таҕыста.
Уол оҕо тустуунан дьарыктанара олус туһалаах уонна инниктин наадалаах буолуон сөп. Биһиги тренербытыгар уонна өйдүүр-өйүүр төрөппүттэрбитигэр куруук махтанабыт.
Арылхан Семенов, «Ыллык» эдкорпост, Ньурба, Хаҥалас.