Бэс ыйын 16 күнүгэр күн-дьыл анаабыт курдук туран биэрдэ. Ф.И. Авдеева аатынан Оҕо айымньытын дыбарыаһын “Этигэн хомус” СӨ норуодунай ансаамбылын оҕолоро норуоттар икки ардыларынааҕы “Виртуоз мира” III күөн күрэс чэрчитинэн ыытыллыбыт флешмобка көхтөөхтүк кытынныбыт. Ол курдук, Дьокуускай куорат араас оскуолаларыттан дьарыктанар 16 оҕо төрөппүттэрин кытта кытынна.
Хомус эйгэтэ олус ыраас уонна сырдык, дьону кэрэҕэ түмэр, үтүө үгэһи утумнуур ураты тыыннаах. Орджоникидзе болуоссатыгар араас саастаах дьон сахалыы таҥастарын кэтэн, ох курдук оҥостон кэлбиттэрэ көрүөххэ үчүгэйэ сүрдээх этэ.
Тэрээһин үчүгэй, Хомус аан дойдутааҕы мусуойун үлэһиттэрэ киэҥ далааһыннаах дьоһун тэрээһини таһымнаахтык көҕүлээн, кэлбит ыалдьыттар астынан-дуоһуйан баралларыгар баҕа санаабын тириэрдэбин! Хомус эйгэтэ үрдүкү салалтаттан өйөбүллээх. Олус үчүгэй!
Биһиги “Этигэн хомус” ансаамбылбыт тэрээһиннэргэ куруутун көхтөөхтүк кыттабыт, оҕону, ыччаты патриот быһыытынан иитиигэ маннык түгэннэр ураты суолталаахтар. Дьону кытта алтыһыы билиҥҥи кэмҥэ олус наадалаах.
Импровизатор -хомусчут, Ф.И. Авдеева аатынан Оҕо айымньытын дыбарыаһын “Этигэн хомус” СӨ оҕо норуодунай ансаамбылын салайааччы, РФ норуотун үөрэҕириитин туйгуна А.С. Жиркова.
“100” сыыппара буолан кэчигирээн турдубут
Мин норуоттар икки ардыларынааҕы флешмобка аан бастаан кытынным. Хомуска оонньооччулар атын улуустартан эмиэ кытта кэлбит этилэр. Ону таһынан Россия регионнарыттан, тас дойдулартан бастыҥ оонньооччулар 300 киһи хомуска оонньуурун көрдүлэр, бэйэлэрэ эмиэ хомустаатылар. Биһиги бары Саха Өрөспүүбүлүкэтин 100 сылынан “100” сыыппара буолан кэчигирээн турдубут ээ. Үөһэттэн, чыычаах көтөр үрдүгүнэн квадракоптерынан устубуттара. Мин бу флешмобтан олус астынным: элбэх хомусчуту көрдүм, үгүстүк хаартыскаҕа түстүм.
Сандаара Порядина, Ф.И. Авдеева аатынан Оҕо айымньытын дыбарыаһын “Этигэн хомус” СӨ норуодунай ансаамбылын иитиллээччитэ, Дьокуускай куорат 17 №-дээх оскуолатын үөрэнээччитэ.
Улуу хомусчуттары көрөн үөрдүм
Хомус бэрт элбэх сиргэ биллэр. “Аан дойду виртуоз-хомусчута” куонкурус аһыллыыта бэрт үчүгэйдик ааста.
Мин улуу хомусчуттары көрөммүн олус үөрдүм. Элбэх киһи буолан, 100 сыл оһуорун оҥорон, бары бииргэ хомуска оонньуурбутуттан наһаа астынным.
Ярослав Ядреев, А.Г., Н.К. Чиряевтар ааттарынан Дьокуускай куораттааҕы национальнай гимназия үөрэнээччитэ.