Сэтинньи 7 күнүгэр оскуолабытыгар Лука Николаевич Турнин аатынан истипиэндьийэ хаһаайына, өрөспүүбүлүкэтээҕи «Muus Ustar» ыччат бэстибээлин «Khomusvision» күрэх кыайыылааҕа, оскуолабыт «Тэтим» фольклорнай бөлөх салайааччыта, өрөспүүбүлүкэтээҕи «100 бастыҥ педагог» куонкуруска Ил Дархан анал бириэмийэтин кыайыылааҕа, импровизатор-хомусчут Игорь Николаевич Игнатьев ааптарыскай бырайыагынан аан маҥнайгытын ыытыллар улуустааҕы «ХОМУС АЛЫПТААХ ДОРҔООНО» күрэх буолан ааста.
Күрэх 4 бөлөҕүнэн ыытыллынна:
- Уһуйаан иитиллээччилэрэ (биирдиилээн, бөлөҕүнэн толоруу)
- Алын сүһүөх кылаас үөрэнээччилэрэ (биирдиилээн, бөлөҕүнэн толоруу)
- Орто сүһүөх кылаас үөрэнээччилэрэ (биирдиилээн, бөлөҕүнэн толоруу)
- Улахан сүһүөх кылаас үөрэнээччилэрэ (биирдиилээн, бөлөҕүнэн толоруу)
Талааннаах кыттааччыларбытын Арассыыйа Бэдэрээссийэтин уопсай үөрэҕириитин бочуоттаах үлэһитэ, Саха Өрөспүүбүлүкэтин үөрэҕириитин туйгуна, бочуоттаах бэтэрээнэ, Саха Өрөспүүбүлүкэтин Ил Дарханын Гранын хаһаайына, Үрүҥ көмүс бэлиэ Маастар педагог хаһаайына, Майа сэлиэнньэтин бочуоттаах олохтооҕо, дьүүллүүр сүбэ бэрэссэдээтэлэ Евдокия Петровна Иванова, Саха Өрөспүүбүлүкэтин култууратын туйгуна, Гаврил Гаврильевич Колесов аатынан оройуоннааҕы “Олоҥхо Дьиэтэ” норуот айымньытын киинин салайааччыта Айта Семеновна Васильева, Аллараа Бэстээх бөһүөлэгин Василий Васильевич Местников аатынан култуура дьиэтин фольклорун исписэлииһэ Ларьяна Дмитриевна Васильева, «Кыталык» оҕо ыччат эстетическэй киинин фольклорга исписэлииһэ Светлана Васильевна Никитина, Тимир ууһа Виктор Иванович Захаров – Удьуор Уус уонна бырайыак ааптара Игорь Николаевич Игнатьев дьүүллээтилэр, сыаналаатылар.
Күрэххэ уопсайа 250 үөрэнээччи кыттыыны ылла. Кыттааччыларга барыларыга туоһу сурук уонна хас биирдии бөлөххө Үктэллэр, Үрдэллэр туттарыллыннылар. Ол курдук, биирдиилээн толорууга кылаан чыпчаал хаһаайынынан Герасим Иванович Соловьев аатынан Россолода оскуолатын үөрэнээччитэ Өркөн Харитонов буолла. Оттон бөлөҕүнэн толорууга кылаан чыпчаал хаһаайынынан Владимир Петрович Ларионов аатынан Майа орто оскуолатын, 7 «а» кылааһын «Ытыс ымыыта» хора буолла .
Күрэххэ И.Н. Игнатьев, элбэх функциялаах спортивнай комплекс «Парус», В.И. Захаров, И.Г. Колесов аатынан Олонхо дьиэтэ, МКУК МФКК Табага, «Мичил» Майатааҕы оҕо уһуйаана, «Сардаана» Майатааҕы оҕо уһуйаана, «Дьиэрэй» фольклорнай ансаамбыл, «Мичил» Төхтүрдээҕи оҕо уһуйаана, Ф.Г. Охлопков аатынан Майа орто оскуолата, Төхтүрдээҕи оҕо искусствотын оскуолата, Үөрэхтээһин эйгэтин үлэһиттэрин идэлээх сойууһа курдук 13 спонсор көмөтүнэн 113’500 солкуобай сууммалаах бириистэр туруорулуннулар. Түгэнинэн туһанан күрэҕи өйүүбүт спонсордарбытыгар махталбытын тиэрдэбит!
Игорь Николаевич Игнатьев хомуска дьоҕурдаах оҕолору иитэн таһаарар, норуот култууратын сайыннарар уонна үйэтитэр уһулуччулаах үлэтэ үрдүктүк сыаналанан, улууспут Аҕа баһылыгыттан, улуустааҕы үөрэҕэрии салалтатыттан, култуура салалтаттыттан махтал суруктары тутта. Маны таһынан, И.Г. Колесов аатынан Олоҥхо дьиэтэ «Төрүт үгэһи тарҕатааччы» диэн үрдүк ааты сүгэр түөскэ кэтиллэр бэлиэнэн наҕараадалаата. Улууспут араас тэрилтэтэ Игорь Николаевич уһулуччулаах үлэтин, сүдү кылаатын сыаналыыр элбэх эҕэрдэ тылларын эттилэр.
Игорь Николаевичка өссө даҕаны үрдүк ситиһиилэри, айар үлэҕэ күүһү-уоҕу баҕарабыт! Кини норуотун култууратын сайыннарар сыралаах үлэтэ үтүө түмүктэри аҕаллын! Игорь Николаевич оскуола үөрэнээччилэригэр уонна хомуһу интэриэһиргиир оҕолорго сүбэ-ама биэрэн, билиититтэн бэрсэн, күндү уопутуттан үллэстэн, бары үөрэ-көтө тарҕастылар.
Сиһилии видео-матырыйаалга көрүҥ:
Суруйда: Айыына Долгунова, 8 «а» кылаас үөрэнээччитэ,
Хаартыскаҕа түһэрии: Настя Бандерова, 6 «б» кылаас үөрэнээччитэ,
Видоеҕа уһулуу: Айтал Самыров, Эрхан Петров, 6 «а» кылаас үөрэнээччилэрэ,
Видеоны таҥыы: Эрхан Петров, 6 «а» кылаас үөрэнээччитэ,
Ф.Г. Охлопков аатынан Майа орто оскуолата,
«Түмэн» медиа-киин кэрэспэдьиэннэрэ.
keskil14.ru