Ньурба улууһун Хатыы орто оскуолатын 11 кылааһын үөрэнээччитэ Сайаана Тимофеева «Инникигэ хардыы» научнай-практическай конференцияҕа эмтээх отторго аналлаах мобильнай сыһыарыы оҥорбутун туһунан кэпсээн бүгүн экспердэр иннилэригэр кэпсээтэ. Тиэмэтэ — «Сохранение рецептов традиционной медицины народа Cаха в формате android приложение» Салайааччыта — Евдокия Гаврильевна Тимофеева, Хатыы орто оскуолатын биология учуутала.
Сайаана бырайыагын туһунан маннык кэпсиир:
— Сахабыт сирин олохтоохторуттан куйаар ситимин нөҥүө «Ханнык эмтээх үүнээйилэри билэҕит? Төһө эмтээх оту олоххутугар туһанаҕыт?» диэн ыйынньык оҥорон туоһуласпыппыт. Ол түмүгүнэн, 46 эмтээх, ол иһигэр 17 буортуну аҕалбат, доруобуйаҕа куттала суох үүнээйилэри киллэрбиппит. Онтон араас эмтээх отторунан оҥоһуллар ырысыаптары тэҥнээн сортировкалаан, биохимиятын үөрэттибит, фармакологическай бөлөхтөргө араартаатыбыт, медпрепараттары кытары тэҥнээн көрдүбүт.
Онон биһиги салайааччыбын кытары мунньубут матырыйаалбытын барытын хомуйан, сахалыы эмтээх отторго аналлаах бастакы мобильнай сыһыарыыны оҥордубут. Бу маны Плэй Маркеттан хачайдаан ылан номнуо туһаныахха сөп. Билигин хас биирдии киһиэхэ илиитигэр телефон баар, ол иһин туттарга даҕаны табыгастаах уонна тарҕанааһына да түргэн. Уонна кылаабынайа үүнэр көлүөнэ эмтээх оттору билэ улаатыа, туһаныа, бар дьон доруобуйа бөҕөргүүрүгэр өбүгэбит үгэһинэн эмтээх оттору тутта үөрэниэхтэрэ диэн эрэллээхпит.
Саҥа «Эмтээх от» сыһыарыыны телефоҥҥар Play Market-тан бу сигэнэн хачайдаан туһаныахха сөп: https://play.google.com/store/apps/details?id=com.wEmteehot_16228461
keskil14.ru