Быйыл Болот Боотур аатынан Хатылы орто оскуолатыгар аан маҥнайгытын байыаннай-патриотическай сбор ыытылынна. Тэрээһини оскуолабыт иитии чааһыгар салаата, эр дьон учууталлар, үлэһиттэр уонна Дьокуускайдааҕы кадетскай оскуола-интэринээт үлэhиттэрэ Роман Александрович Попов – «Авангард» үөрэнэр киин дириэктэрин солбуйааччы, Федор Игоревич Соловьев – офицер — иитээччи, Арылхан Прокопьев – кадет, VII-XI кылаас уолаттарыгар анаан ыыттылар.
Роман Александрович Попов — «Авангард» үөрэнэр киин дириэктэрин солбуйааччы, делегация салайааччыта.
– Үтүө күнүнэн Роман Александрович! Оскуолабытыгар ыытылла турар дьаhал туhунан сырдатыаҥ дуо?
– Хатылы орто оскуолатын VII-XI кылааhын үөрэнээччилэригэр, уопсайа 40-чэ уолга байыаннай теорияҕа үөрэх, практическай дьарыктар строевой хаамыыга, тактическай, инженернай бэлэмнэниилэргэ ыытылыннылар. Yс взводка хайдан дьарыктаннылар, бэйэ-бэйэлэрин кытары күрэхтэстилэр. Уолаттар сүрдээх кыhамньылаахтар, дьаныардаахтар, элбэҕи билэргэ-көрөргө дьулуhаллар. Байыаннай идэни сэҥээрээччилэр да элбэхтэр эбит.
Арылхан Прокопьев – кадет, X кылаас үөрэнээччитэ, старшай сержант, делегация чилиэнэ.
– Үтүө күнүнэн Арылхан! Кадетскай оскуола туһунан кылгастык кэпсиэҥ дуо?
– Мин Кадетскай оскуолаҕа VII кылаастан үөрэнэбин, билигин старшай сержант диэн званиелаахпын. Бэйэм Эдьигээнтэн төрүттээхпин, Кадетскай оскуола туhунан V кылааска үөрэнэ сылдьан телевизорга көрбүтүм. Онтон ыла ыра санаа оҥостон, дьарыктанан, тургутук бөҕөнү ааhан үөрэнэ кирбитим. Кадетскай оскуола диэн боростуой оскуола буолбатах. Онно барыта байыаннай өттүнэн дьарыктар, аармыйаҕа курдук, устаабынан сылдьабыт. Сарсыардаттан эбиэккэ диэри үөрэнэбит, эбиэттэн киэhэ байыаннай дьарыктарга сылдьабыт.
– Оскуолаҕын бүтэрдэххинэ байыаннай идэни ылар санаалааххын дуо?
– Байыаннай үөрэххэ барбыт киһи диэн баҕа санаалаахпын. Санкт-Петербурга Михайловскай артиллерийскэй училищеҕа үөрэнэ барыахпын саныыбын.
– Биhиги оскуолабыт уолаттарыгар тугу баҕарыаҥ этэй?
– Yчүгэйдик кыhаллан туран үөрэниҥ, эккитин-хааҥҥытын дьарыктааҥ. Инникитин байыаннай идэлээх буолар баҕа санаалаах буоллаххытына, биhиги оскуолабытыгар кэлэн үөрэниҥ диэн ыҥырабын.
Уруйдаан Барашков, IX кылаас, Хатылы орто оскуолата, 2 взвод хамандьыыра.
– Уруйдаан, бу икки күн иhигэр тугу биллиҥ-көрдүҥ? Сбор хайдах ааста дии санаатыҥ?
– Дьокуускай куорат кадет оскуолатыттан кэлэн биhигини үөрэттилэр. Икки күн иһигэр аармыйа олоҕун көрдүбүт, биллибит. Yс взводка хайдан дьарыктанныбыт, мин иккис взвод командирабын. Стройга хайдах сөпкө хаамарга, автомат ыһарга, хомуйарга, сэриигэ хайдах туттарга-хаптарга, дьону эмтииргэ, бастакы көмөнү оҥорорго, ыксаллаах быhыыга полицияны хайдах буларга үөрэннибит. Иккис күммүтүгэр А.А.Федоров сылгытын хааччаҕар баран кэллибит уонна нэhилиэкпит уустара биhиэхэ интэриэhинэй маастар-кылаастары ыыттылар. Олус сөбүлээтим, сылын аайы үгэс курдук ыытыллара буоллар диэн баҕа санаалаахпын.
Түгэнинэн туhанан оскуолабыт дириэктэригэр Екатерина Ивановна Егороваҕа, тэрийэн ыыппыт оскуолабыт эр дьон учууталларыгар, үлэһиттэригэр, ыҥырыыбытын ылынан кэлэн элбэххэ үөрэппит кадетскай оскуола-интэринээт үлэhиттэригэр Роман Александровичка, Федор Игорьевичка, Арылхан Прокопьевка, өйөөн ыыппыт дириэктэргэ Алексей Александрович Корякиҥҥа барҕа махталбын тиэрдэбин.
Оскуолабыт уолаттара бу икки күн эр киһи оскуолатын ааһан бэйэлэригэр элбэҕи арыйбыттара уонна инники олохторугар туһаныахтара диэн эрэнэбин!
Лиана Яковлева,
VII «б» кылаас,
Болот Боотур аатынан Хатылы орто оскуолата, Чурапчы