Кыргыттаар, кэлэн иһэринэн! Хайа, тюльпан бэлэх туттугут дуу? Онтон тюльпаны үүннэрии улахан сыраттан турарын биһиги илэ харахпытынан көрдүбүт-иһиттибит.
Дьокуускай куорат олохтоохторо, эдэр ыал Людмила уонна Николай Винокуровтар быйыл тохсунньу ыйтан тюльпан олордон саҕалаан, кэрэ аҥаардар күннэрин көрсө араас дьэрэкээн өҥнөөх сибэккилэри куорат олохтоохторугар бэлэх ууннулар. Винокуровтар элбэх оҕолоох дьиэ кэргэн. Улахан кыыстара Сайаана 5 кылааска үөрэнэр, Айыына 1 кылааска, улахан уол Уйгун 4 саастаах уонна кырачааннара Сарыал 1,5 саастаах.
Хатаска тутулла турар дьиэлэрин теплица курдук оҥостон, барыта 3000-чэкэ тюльпаны көрөн-харайан үүннэрэн таһаардылар. Бэл, кыра кыыс Айыына, Дьокуускай куорат 3 №-дээх орто оскуолатын 1 кылааһын үөрэнээччитэ, сибэккилэригэр араас ырыаны айан, ийэтин кытары тэҥҥэ бүөбэйдэһэр. Ыал ийэтэ Людмила бэйэтэ идэтинэн юрист, билигин оҕо көрөн олорор, аҕалара Николай тутууга үлэлиир. Бу курдук, сэдэх сибэккилэри — тюльпаннары үүннэрэн, эдэр ыал эбии дохуот киллэрэр.
Сиһилии видеоҕа көрүөҕүҥ:
keskil14.ru