П.Н. уонна Н.Е. Самсоновтар ааттарын сүгэр Хатас орто оскуолата өрөспүүбүлүкэҕэ биир бастыҥ үлэлээх агротехнологическай хайысхалаах оскуолалар ахсааннарыгар киирэр.
Оскуола «Үөрэхтээһин» национальнай бырайыак чэрчитинэн үлэлиир «Хас бирдии оҕо ситиһиитэ» федеральнай бырагыраама куонкуруһугар «Уопсай үөрэхтээһин тэрилтэтин баазатыгар научнай-чинчийэр лабораторияны тэрийиигэ» грант кыайыылааҕа. 2019 с. үүнээйилэри төгүрүк сыл устата олордор, чинчийэр, кэтээн көрөр «Агрокуб» научнай лаборатория арыйан үлэлэтэр. Оскуола дириэктэринэн Николай Слепцов ситиһиилээхтик үлэлиир.
«Агрокуб» лабораторията агротехнология, агробиотехнология, агроэко хайысхаларынан оҕолору кытары ситимнээх үлэни ыытар. Лабораторияҕа үүнээйи селекциятын чинчийэллэрин таһынан, үөрэнээччилэр араас суортаах үүнээйилэри аныгы технология көмөтүнэн кэтээн көрөллөр.
Бу күннэргэ Москва куоракка XXIV Бүтүн Арассыыйатааҕы тыа хаһаайыстыбатын «Көмүс күһүн-2022» быыстапкатыгар Хатас агробизнес оскуолата икки кыһыл көмүс уонна биир боруонса мэтээллэринэн наҕараадаланна!
Ол курдук, кыһыл көмүс мэтээлинэн уонна дипломунан Хатас агрооскуолатын үөрэнээччилэрин бырайыактара үрдүктүк сыаналанна: маҥнайгы миэстэни 11-а кылаас үөрэнээччилэрэ Каролина Петрова уонна Алина Бурцева «Сылгы этиттэн тушенка» үлэлэрэ (салайааччы Николай Афанасьевич Матвеев) уонна оскуола иһинэн үлэлиир «Дьулуур» үлэ лааҕыра «Дьөлүһүөннээх кучу чэй» бырайыага ыллылар!
Онтон боруонса мэтээлинэн 8-в кылаас үөрэнээччитэ Юлиана Пестрякова «Натуральнай мүөт» бырайыага наҕараадаланна, салайааччы — Илья Дмитриевич Пестряков.
Хатас агрооскуолатын кэлэктиибин, үөрэнээччилэрин таһымнаах күрэххэ үрдүк ситиһиилэринэн эҕэрдэлиибит!
keskil14.ru