П.Н. уонна Н.Е. Самсоновтар ааттарын сүгэр Хатас агро хайысхалаах орто оскуолата «Ас-үөл» өрөспүүбүлүкэтээҕи быыстапка-дьаарбаҥкаҕа саҥа бородууксуйатын билиһиннэрдэ. «Огурцы по-шашлычному» кэнсиэрбэлэммит оҕурсууну «Хатас оскуолатын агробизнеһэ» ТХПК оҥорон таһаарда. Быйыл Хатас агрооскуолата алтынньыга Москваҕа буолар агропромышленнай быыстапкаҕа биэс бырайыагы билиһиннэрэр, ол иһигэр ураты ырысыабынан тууһаммыт оҕурсууну.
Николай Матвеев, Хатас агро хайысхалаах орто оскуолатын дириэктэри саҥаны киллэриигэ уонна агро хайысхаҕа солбуйааччы:
— Быйыл оскуолабыт таһыгар учаастактанан, теплица туруоран, оҕуруоппут аһынан саҥа бородууксуйа оҥордубут. Хотунум Галина Ильинична Адамова ырысыабын туһанан олоххо киллэрдим. Бу бородууксуйа Москваҕа «Көмүс күһүн» быыстапкаҕа кыттыахтаах. Алтынньы 8-11 күннэригэр бырайыактардаах түөрт оҕону илдьэ производственнай үөрэх маастарын кытары барыахтаахпыт. «Хатас оскуолатын агробизнеһэ» ТХПК-ҕа сыллата 120 оҕо үлэлээн хамнас аахсар, оҕолор оҥорон таһаарар бородууксуйалара дьоҥҥо-сэргэҕэ киэҥник биллэр, атыыга хамаҕатык барар.
Былырыын «Көмүс күһүн» быыстапкаттан Хатас агрооскуолата биэс мэтээли аҕалта. Быйыл да ситиһии тосхойуо диэн эрэллээхпит.
Сиһилии видеоҕа:
keskil14.ru