Өрөспүүбүлүкэҕэ билиҥҥитэ 91 агро хайысхалаах оскуола үлэлиир. Олор истэригэр П.Н. уонна Н.Е. Самсоновтар ааттарынан Хатас агро хайысхалаах оскуолата үлэтинэн даҕаны, ситиһиитинэн даҕаны бастыҥнар кэккэлэригэр сылдьар. Арассыыйа наукатын академиятын 15 тирэх оскуолатын ахсааныгар киирэр.
Сылын аайы Дьокуускай куоракка ыытыллар күһүҥҥү ас-үөл атыы-эргиэн дьаарбаҥкатыгар Хатас орто оскуолата өрүүтүн кыттар уонна саҥа бородууксуйаларын билиһиннэрэр. Билигин оскуола иһинэн агро бизнес ТХПК оҥорон таһаарар аһа-үөлэ Саха сиригэр эрэ буолбакка, бүтүн дойду үрдүнэн биллэр. Хатарыллыбыт собо миинэ, ис миинэ, убаһа этинэн тушенка, кучу чэй анал байыаннай дьайыы байыастарыгар гуманитарнай көмө быһыытынан тиийэллэр.
Анастасия Николаева, агро хайысхалаах Хатас орто оскуолатын «Основы предпринимательства» куруһуогун салайааччыта:
— Биһиги оскуолабыт анал байыаннай дьайыы саҕаланыаҕыттан байыастарга гуманитарнай көмөнү оҥорор. Бу билигин балаҕан ыйын 27 күнүгэр диэри 7000 хатарыллыбыт собо миинин оҥорон байыастарга ыытыахтаахпыт. Саҥа үөрэх дьылыгар бородууксуйабытын өссө кэҥэтэр былааннаахпыт. Эһиил сайын лааҕырбытыгар оҕо ахсаанын элбэтэр сыал турар. Маны таһынан оҕуруот аһын эмиэ элбэтэр былаан баар. Оскуолабыт үөрэнээччилэрэ күннэтэ сибиэһэй аһылыгы аһыыр буолалларын ситиһэргэ дьулуһабыт.
Бу күһүн Москваҕа ыытыллар «Көмүс күһүн» агропромышленнай быыстапкаҕа агро хайысхалаах Хатас орто оскуолата саҥа бородууксуйаларыттан: тууһаммыт оҕурсууну, уомултан хатарыллыбыт миини, «Бриллианты Якутии» кэмпиэти билиһиннэрэргэ бэлэм.
Сиһилии видеоҕа:
keskil14.ru