Саха Өрөспүүбүлүкэтигэр олунньу 13 күнүгэр төрөөбүт тыл уонна сурук-бичик күнэ бэлиэтэнэр. И.В. Николаев аатынан Харбалаахтааҕы норуот айымньытын дьиэтигэр «Ийэ-тыл уонна сурук-бичик» күнүн көрсө «Омук күүһэ-өйүгэр, өйүн күүһэ тылыгар» диэн нэһилиэк тэрилтэлэрин икки ардыларыгар «Тыл оонньуутун» күрэҕэ буолан ааста.
Ол курдук, нэһилиэкпит тэрилтэлэриттэн 3 киһилээх хамаанда туруоран көхтөөх кыттыыны ыллылар: «Төлөн» АО, Харбалаахтааҕы үөрэхтээһин холбоһуга, Харбалаахтааҕы балыыһа, баһаарнай чааһа, оҕо искусствотын оскуолата уонна олохтоох дьаһалта күөн көрүстүлэр, билиилэрин тургуттулар. Быйыл бу оонньуу хаһыс да төгүлүн ситимин быспакка ыытыллар. Инники сылларга «ТОК» оонньууну саха тылын уонна литературатын учуутала Валентина Семеновна Кривошапкина салайыытынан тэриллэн ыытыллара.
Быйыл тэрээһини оскуолабыт саха тылын уонна литературатын учууталлара Трофимова Варвара Павловна, Седалищева Евдокия Ивановна, олохтоох библиотека сэбиэдиссэйэ Дианна Егоровна Соломонова уонна сынньалаҥ киин үлэһиттэрэ тэрийэн ыыттылар. Оонньуу 3 түһүмэҕинэн ыытылынна. Кылгастык эттэххэ маҥнайгы түһүмэххэ: өс хоһооннор, тылы үөрэппит учуонайдар, Н.Е. Мординов-Амма Аччыгыйа, Д.К. Сивцев-Суорун Омоллоон, А.И. Софронов-Алампа, тыл суолтата уо.д.а уустук боппуруостарга хоруйдаатылар. Иккис-үһүс түһүмэхтэргэ тыл суолталарын быһаардылар, холобура үһүс түһүмэххэ хапытааннар хамаандаларыгар тутатына мүнүүтэҕэ ойууга суруллубут тыллары сахалыы быһаарар, холобура “Тоҥсоҕой ” диэн тылы “Мас үөнүн сиир, олорон тоҥсуйар” диэн быһаарыахха сөп.
Бу курдук, төрөөбүт төрүт тылбытыгар аналлаах нэһилиэк тэрилтэлэрин икки ардыларыгар ыытыллыбыт «Тыл оонньуута» сүрдээх сэргэхтик ааста. Оонньуу түмүгүн дьүүллүүр сүбэ билиһиннэрдэ, түмүк маннык буолла: үһүс миэстэни балыыһа, МПЧ-2 «Аламай» хамаандата, иккис миэстэни «Төлөн» АО хамаандата, бастакы миэстэни Харбалаахтааҕы үөрэхтээһин холбоһуга «Эрчим» хамаандата ыллылар. Кыттыбыт хамаандалар туоһу суруктарынан уонна грамотанан наҕараадаланнылар.
Кыттааччылар бары үөрэ-көтө оонньоон, ийэ тылларын өссө билэн, билиилэрин хаҥатан тарҕастылар. Бары кыттааччыларга уонна тэрийээччилэргэ махтанабыт. Өссө да маннык сэргэх, киһи өйүн-санаатын сайыннарар, уһугуннарар уонна киһини толкуйдатар оонньуулар сылын аайы ыытылла турдуннар!
Варианна Макарова, Харбалаахтааҕы үөрэхтээһин холбоһугун директоры иитэр үлэҕэ солбуйааччы, Таатта