Бүгүн, балаҕан ыйын 10 күнүгэр, Харбалаахтааҕы үөрэхтээһин холбоһугар үөрүүлээх күн тосхойдо. «Үөрэхтээһин» национальнай бырайыак сүнньүнэн «Сайдыы төрдө»-«Точка роста» түөрт кабинета үөрүүлээх быһыыга арылынна. Физика, биология, химия, информатика кабинеттарыгар оҕолор эбии дьарыктанан, сайдар суолларыгар олук уурулунна.
Быйыл оскуоланы бүтэрбит 8 үөрэнээччибит барыта сөбүлүүр идэлэригэр үөрэххэ киирдилэр. Математика, нуучча тылын ЕГЭ-лэрин 11 кылаастарбыт үрдүк баалга туттарбыттара. Бу уопуттаах учууталлар Ирина Романовна Бястинова, Ксения Владимировна Григорьева утумнаах үлэлэрин үтүө түмүгэ буолар. Дириэктэр Анна Васильевна Мосоркина үөрэнэр, үлэлиир усулуобуйа баар буоларын туһугар кэскиллээхтик үлэлиир.
Быйылгы саҥа үөрэх дьылыгар маҥнайгы кылааска 16 үөрэнээччи киирдэ. Кинилэри иккис сылын үлэлиир эдэркээн, кэскиллээх учуутал Кристина Игнатьевна Старостина үөрэтэр. Быйыл оскуоланы бүтэриэхтээх 11 кылаастарбыт ааспыт үөрэх дьылыгар волонтерскай, тимуровскай, байыаннай патриотическай хайысхаларга, «Ытык сирдэр» бырайыак сүнньүнэн үгүс үлэни ыытаннар, «Золотой фонд Российского образования» Бүтүн Арассыыйатааҕы куонкуруска кыттыннылар. Кинилэри саха тылын учуутала Варвара Павловна Трофимова салайар. Кыттааччыларга анал диплом, кубок кэлэн үөрүүнү үксэттэ.
Сотору кэминэн лицей өттүгэр икки толору сэбилэниилээх мастарыскыай аһыллыахтаах. Онон үөрэх-сайдыы суолугар тэҥҥэ үктэһэр усулуобуйа тэриллэриттэн үөрэбит!
Таисия Андреева, 8 кылаас үөрэнээччитэ, учуутал Валентина Кривошапкина,
Таатта, Харбалаах.