Ааспыт нэдиэлэҕэ Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар үөрүүлээх тэрээһин буолла.
Улуу убайбыт Былатыан Ойуунускай төрөөбүт күнэ, 129 сыла диэн, саха тылын учуутала Варвара Павловна Трофимова бэсиэдэ оҥордо.
Онтон П.А. Ойуунускай төрөөбүтэ 130 сылын көрсө уонна “Таптыыбын төрөөбүт дойдубун – Сахам сирин” тиэмэҕэ аналлаах өрөспүүбүлүкэтээҕи “Таатта-ийэ тыл биһигэ” алын сүһүөх кылаас үөрэнээччилэригэр ыытыллар бөлөҕүнэн уус-уран ааҕыы күрэҕэр биһиги оскуолабыт 4-с кылааһын уолаттарын бөлөҕө 2-с миэстэни ылбыт хоһоонньуттара (салайааччылар Кривошапкина В.С., Винокурова С.Р.) Былатыан Ойуунускай «Бырастыы» хоһоонун ааҕан ньиргиттилэр.
Холбоһук саабыһа Евдокия Ивановна Седалищева кыайыылаахтары эҕэрдэлээтэ, Грамоталары туттарда. Атын да ситиһиилээх оҕолор бу күн араас таһымнаах Грамоталары тутан, сүргэлэрэ көтөҕүлүннэ.
Наташа Никифорова, XI кылаас.
Харбалаах, Таатта