Ахсынньы 13 күнүгэр И.Н. Винокуров аатынан «Айылгы» норуот айымньытын дьиэтигэр буойун учуутал, саха Маресьева Степан Кузьмич Макаров аатынан Чурапчы гимназиятын 30 сыллаах үбүлүөйдээх тэрээһинэ буолла.
Үөрүүлэх тэрээһини Гимназия учууталларын кэлэктиибин хора арыйда.
Гимназистар 4 тылынан хоһоон ааҕан дьону-сэргэни сөхтөрдүлэр. Онтон оҕолор, учууталлар гимназиябыт өрөгөй ырыатын киэн тутта, киһи астынар гына, ыллаатылар.
Гимназия киэн туттар выпускниктара «Басхан» өрөспүүбүлүкэтээҕи лиидэр оҕолор Кылаан кыайыылааҕа, өрөспүүбүлүктээҕи «Көтүөххэ хотойдуу үрдүккэ» уоланнар ааҕыыларын «Бастыҥ ааҕааччыта» Андрей Степанов уонна ааттаах-суоллаах учууталбыт Сардаана Николаевна Гоголева иилээн-саҕалаан ыыттылар.
«Дьиэрэҥкэй» үҥкүү ансаамбыла чороонноох үҥкүүлээтилэр, саала иһэ ытыс тыаһынан туолла.
Ырыанан утумнаахтык дьарыктанар кыргыттар Сардаана Старостина уонна Кристина Куличкина ылбаҕай ырыаны бэлэхтээтилэр.
Хоһоон ааҕар уолаттар «Умсулҕан» бөлөхтөрө литературнай дьүһүйүү көрдөрдүлэр. Доҕотторбут олус маладьыастар, сүрдээх үчүгэй нүөмэрдэринэн бырааһынньыгы киэргэттилэр.
Үөрэн-көтөн туран ыҥырыылаах ыалдьыттар эҕэрдэ тыллары эттилэр. Үрдүк ситиһиилээх, үлэлэригэр бэриниилээх учууталлары, үлэһиттэри үрдүк сыанаҕа чиэстээтилэр.
Ол курдук, үөрэх уонна иитии үлэтин тэрийиигэ дьоһун кылаатын, өр сыллаах үтүө суобастаах үлэтин иһин «Российскай Федерация уопсай үөрэхтээһинин бочуоттаах үлэһитэ» бэлиэнэн Николай Николаевич Романов, физкультура учуутала, наҕараадаланна.
Өр сыллаах үтүө суобастаах үлэтин, үүнэр көлүөнэни иитиигэ-үөрэтиигэ дьоһун кылаатын иһин “Идэҕэ бэриниитин иһин” бэлиэнэн – Фекла Николаевна Болдовская, саха тылын уонна литературатын учуутала; Георгий Иванович Барашков, эбии үөрэхтээһин педагога, Марина Николаевна Филиппова, история уонна обществознание учуутала – үөрэх систиэмэтин сайыннарыыга, үүнэр көлүөнэни үөрэтиигэ уонна иитиигэ тус кылааттарын иһин «Саха Өрөспүүбүлүкэтин үөрэҕириитин систематын туйгуна»; Наталья Алексеевна Белолюбская, омук тылын учуутала – үөрэх уонна иитии үлэтин тэрийиигэ дьоһун кылаатын, үтүө суобастаах үлэтин иһин «Педагог-наставник»; Марфа Ивановна Аржакова, педагог-психолог, Игорь Ильич Лазарев, история уонна обществознание учуутала – учуутал идэтигэр бэриниилэрин, үөрэх систиэмэтин сайыннарыыга киллэриллибит тус кылаатыниһин «Саха сирин эрэлэ”.
Ону таһынан учууталларбытыгар үрдүк таһаарылаах үлэлэрин иһин махтал суруктары, бочуоттаах грамоталары, онтон да атын наҕараадалары туттардылар.
Бэлиэ түгэнинэн выпускниктар тапталлаах гимназияларын, учууталларын эҕэрдэлээтилэр. Төрөппүттэрбит ааттарыттан, «Ситим» төрөппүт кэмитиэтин бэрэссэдээтэлэ Евдокия Ксенофонтовна Ван-Чу-Лин уонна кэмитиэт чилиэнэ Мария Дмитриевна Монастырева, “Эр Тойон” аҕа түмсүүтүн салайааччыта Андрей Герасимович Собакин эҕэрдэ тыл эттилэр, төрөппүттэр бэлэхтэрин туттардылар.
Степан Кузьмич Макаров аймах-билэ дьоно ыалдьыттаатылар. Кинилэр ааттарыттан Степан Кузьмич төрөппүт кыыһа Татьяна Степановна Таманнырова эҕэрдэлээтэ. Гимназия түмэлигэр улуу киһибит үтүө аатын үйэтитэр тэрээһиннэри кэрэһилиир хаартыска альбомнарын бэлэх ууннулар.
Олус долгутуулаах, кэрэ эйгэлээх түгэн олохтонно. Хор, хоһоон, үҥкүү – барыта астык. Хараҕы уматар, сүрэҕи үөрдэр тэрээһин буолла. Дьон-сэргэ үөрэллэрин көрө-көрө сүргэҥ көтөҕүллэр.
Үбүлүөйдээх 30 сылгынан, тапталлаах гимназиябыт!
София ГОГОЛЕВА, IX кылаас, «Тумус кыһа» медиа-киин,
С.К. Макаров аатынан Чурапчы гимназията
Винея Барашкова, X кылаас,
Афоня Местников, VIII кылаас
хаартыскалара