Ыам ыйын 27 күнүгэр Кеша Алексеев аатынан Хаптаҕай орто оскуолатыгар Пионерия төрүттэммитэ 100 сылыгар аналлаах тэрээһин турсүлүөтү кытта тэҥҥэ ыытылынна.
Бастакы чааһа Пионерия 100 сылынан бэтэрээн баһаатайдары Т.П. Максимованы, О.П. Заровняеваны эҕэрдэлээтибит уонна кинилэр ахтыыларын иһиттибит. Биһиги көлүөнэ пионер диэни билбэтэх, кырдьыгын эттэххэ, соччо истибэтэх көлүөнэбит. Бэтэрээннэр кэпсээннэриттэн иһиттэххэ пионер диэн сүрдээх эппиэтинэстээх үөрэнээччи эбит: үчүгэйдик үөрэнэр, сымыйалаабат, саастаах дьоҥҥо көмөлөһөр, алын кылаас оҕолоругар холобур буолар, дойдутугар бэриниилээх.
Кылаас этэрээт дэнэр эбит, туһунан ааттаах, девизтээх, өрүүтүн инники күөҥҥэ сылдьар. Бэтэрээннэрбит оскуола лиидэрэ Карина Васильеваны кытта тэрээһин былааҕын таһаардылар. Онтон биһиги хас биирдии кылаас маршировкалаан, ыллаан, үҥкүүлээн бэтэрээннэрбитин эҕэрдэлээтибит.
Тэрээһиммит иккис түһүмэҕэ турслет буолла. Манна кылаас хамаандалара түһүмэхтринэн араас туризм күрэхтэрин, мэһэйдэрин аастылар. Күрэх буолан баран төһө да бастыҥнар быһаарыллыбыттарын иһин доҕордоһуу кыайда. Пионердар туризмы олус сөбүлүүр оонньуулара эбит. Ыалдьыттарбыт кэпсээннэриттэн пионер эт-хаан өттүнэн сайдыылаах, сыллата ГТО нуорматын туттарар, үлэни сөбүлүүр буолуохтааҕын өйдөөтүбүт.
Бу күн элбэҕи билэн, күрэхтэһэн бары да астынан быйылгы дьыл үөрэҕин түмүктээтибит.
Валя Спиридонова,
Хаптаҕай оскуолатын Х кылааһын үөрэнээччитэ,
“Кустук” устуудьуйа иитиллээччитэ.