Олунньу 18 күнүгэр Аҕа дойдуну көмүскээччи күнүгэр аналлаах оскуола уолаттарыгар хапсаҕайга аһаҕас турнир ыытылынна. Манна 1-11 кылааска дылы 35 уол кытынна. Күрэхтэһии урукку өттүгэр ыйааһынынан ыытыллар эбит буоллаҕына, быйыл кылаастарынан арахсан ыытылынна.
Ол курдук, 1-2, 3-4, 5-6, 7-8 уонна 9-11 кылаастар диэн 5 бөлөҕүнэн хапсаҕайдастылар. Саамай кыра саастаах хапсаҕайдьыт «Туллукчаана» оҕо уһуйаанын иитиллээччитэ Макаров Вася кэлэн кытынна.
Хапсаҕай кыттыылаахтара бары төрөппүттэр олохтообут минньигэс бэлэхтэрин туттулар. Кылаастарга кыайыылаахтар бары мэтээлинэн уонна добун суругунан наҕараадаланнылар.
Муҥутуур кыайыылаах эмиэ үс ыйааһынынан 1-4-кэ дылы, 5-8-ка дылы уонна 9-11 кылаастарга быһаарылынна. Ол курдук, кыра бөлөххө Сухомясов Вова 4-үс кылаас, орто бөлөххө – Сухомясов Марат 8 кылаас, улахаттарга Винокуров Арсен 11 кылаас буоллулар. Манна кыайыылаахтарга бириэмийэ 3000 солкуобай уу харчынан туттарылынна. Бирииһи оскуола эр дьон учууталлара олохтоотулар.
Күрэхтэһиини көрө кэлбит төрөппүттэр, учууталлар, нэһилиэк олохтоохторо киирсиилэртэн олус астынан, ыалдьан ыһыытаан-хаһыытаан тыҥааһыннаах киирсиилэри олус киэргэттилэр. Бэл диэтэр, спорт бэтэрээннэрэ бэйэлэрэ туспа харчынан бириис олохтообуттара.
И. Ноговицына, Өлөөкө-Күөл орто оскуолата.