Бу күннэргэ Дьокуускай куоракка Саха сирин дьахталларын спартакиадата «Якутянки – надежный тыл страны» диэн лозуннаах ыытыллар. Манна мин ийэм, Хаҥалас улууһун Улахан Аан нэһилиэгин олохтооҕо, спорт бэтэрээнэ Оксана Петровна Апросимова кыттар. Кини 15 №-дээх «Кыымчаан» уһуйааҥҥа асчытынан үлэлиир. Волейболунан сөбүлээн дьарыктанар.
— Хаһааҥҥыттан волейболунан дьарыктанаҕыный?
— Мин оскуолаҕа үөрэнэр эрдэхпинэ физкултуурабыт учуутала Василий Данилович Асекритов волейболга дьарыгар сөбүлээн сылдьарым. Онтон оскуоланы бүтэрэн баран, эдэр эрдэхпиттэн залга сылдьан куруутун волейболлуур этим. Онтон ыла мэлдьи Улахан Аан волейболга хамаандатын капитана буолабын, билигин да оонньуубун, Хаҥалас улууһун бэтэрээннэрин хамаандатыгар баарбын. Волейболлуурбун олус диэн сөбүлүүбүн. Түөрт кыыстаахпын. Кыргыттарбын кытта тэҥҥэ бары оонньуубут.
— Бу спорт көрүҥэ туох уратылааҕый?
— Бу спорт көрүҥүн уратыта диэн хамаанданан оонньуу буолар. Хамаанда бары биир киһи курдук оонньоотоҕуна эрэ кыайыы кэлэр, бары биир сомоҕо буолан оонньоотоххо — оонньуу үчүгэй түмүктээх буолар.
— Спорт киһиэхэ хайдах көмөлөһөрүй?
— Спорт күүстээх, дьаныардаах буоларга, чэгиэн-чэбдик сылдьарга, доруобай буоларга олус диэн туһалаах.
— Спартакиадаттан тугу күүтэҕитий?
— Саха сирин бары улуустарыттан бу спартакиадаҕа дьахталлар түмсэн, ким күүстээх, ким дьаныардаах — ол кыайар. Биһиги хамаанда эмиэ кыайыыны-хотууну баҕарабыт уонна күүтэбит.
— Эдэр ийэлэргэ, кыргыттарга тугу сүбэлиэҥ этэй?
— Мин эдэр кыргыттарга, ийэлэргэ сүбэлиэм этэ: бириэмэ, быыс булан, спортзалга сылдьан, эрчиллэн, доруобуйаҕытын көннөрүнэн, көрүнэ сылдьалларыгар баҕарабын.
— Спартакиадаҕа ситиһиилэри баҕарабыт.
Милена Апросимова,
М.Е.Васильева аатынан II Малдьаҕар орто оскуолатын
X кылааһын үөрэнээччитэ