От ыйа саха киһитигэр кыстыкка бэлэмнэнэр биир саамай тутаах кэмэ. Эһэлэрбит хотуурдарын таптайан, кыраабылларын тиистээн, тиэхиньикэлэрин көрүнэн ходуһаҕа киирэргэ бэлэмнэнэллэр.
Бу кэмҥэ саха төрүт дьарыга – ынаҕы иитии төрөөбүт дойдубар Нам улууһун Хамаҕатта нэһилиэгэр окко бэлэмнэнии хайдах баран иһэрий? Бу туһунан нэһилиэк дьаһалтатын тыа хаһаайыстыбатын специалиһа Маргарита Григорьевна Габышеваны көрсөн ыйыталастым.
– Маргарита Григорьевна, үтүө күнүнэн! Хамаҕаттаҕа ынах иитэр ыал төһө элбэҕий?
– Үтүө күнүнэн! Биллэн турар, урукку сыллары кытта тэҥнээтэххэ, ынах тутар ыал биллэ аҕыйаата. Уопсайа 2 тыһыынча нэһилиэнньэлээх Хамаҕатта нэһилиэгин үрдүнэн сүөһү ахсаана – 602. Икки бааһынай хаһаайыстыба, биир “Туймаада” экоферма баар.
– Билигин, сайыммыт үгэннээн турар кэмигэр, үүт туттарааччы төһө элбэҕий?
– Улууспутугар баар “Эрэл” СХПК Хамаҕаттатааҕы үүт тутар пуунугар икки бааһынай хаһаайыстыба уонна 4 ыал күҥҥэ 300-чэ лиитэрэ үүтү туттараллар. Биир сүрүн кыһалҕабыт үүт тутар пууммут сайын эрэ үлэлиир. Дьон кыһыннары туттарыан баҕарар.
– Окко бэлэмнэнии хайдаҕый?
– Отчуттар от ыйын 15 күнүттэн окко киирэргэ бэлэмнэнэ сылдьаллар.
– Маргарита Григорьевна, эппиэтиҥ иһин улахан махтал!
***
Алын кылааска Хамаҕатта саха-француз лиссиэйигэр үөрэнэ сырыттахпына, биһиги кылааска ини-бии Семенов Эрчимнээх Бэргэҥҥэ эрэ ынахтаах этилэр. Билигин ийэлээх аҕалара Вера Ильинична, Валерий Николаевич Семеновтар сүөһүлэрин ахсаана 14 төбө буолбут, алта ыанар ынахтаахтар. Үүттэрин сүүрдэн сүөгэйин атыылаан эбии дохуот оҥостоллор. Сүөгэйдэрэ хамаҕатык барар, маҕаһыыҥҥа да туттараллар.
Эрчимнээх Бэргэн бырааттарын Эрсаны кытта от үлэтигэр сылдьыһаллар, дьонноругар көмөлөһөн тыраахтар ыыталлар. Күнүн аайы уочаратынан хотоҥҥо ийэлэрин кытта дойканан ынах ыырга көмөлөһөллөр, ньирэйдэрин бүөбэйдииллэр. Оҥорон таһаарбыт үрүҥ астарын атыылаһар дьоҥҥо тиэрдэн биэрэллэр. Ньирэйдэри эмиэ кыра оҕо курдук көрүөххэ-истиэххэ наада. Ынахтара мэччийэн кэлэллэригэр түптэ бэлэмнээн тоһуйаллар. Бу иһин төрөппүттэрэ уолаттары хамнастыыллар. Хайыы-үйэ хамнастарынан Бэргэн сөбүлүүр «Айар-Кут Hollywood» лааҕырыгар барбыт, Эрчимнээх Эрсан электровелосипед ылыммыттар.
Билигин дьиэ кэргэн окко киирээри бэлэмнэнэр. Уолаттар сайын устата дьарыктаахтар, үлэттэн быыс булан сөбүлүүр табаарыстарын кытта футболлууллар.
Мичийэ ШЕЛКОВНИКОВА, VIII кылаас,
Н.С. Охлопков аатынан Нам улуустааҕы гимназията