Чурапчы улууһугар Халыҥ Хадаар нэһилиэгэр Хадаары халыҥ Хадаар дэттэрбит киэҥ туттар тоҕус Герой Ийэлээхпит! Кинилэр 10, 11, 12, 13, 14, 15 оҕоҕо күн сирин бэлэхтээбиттэрэ.
Билигин ыччаттара тэнийэн, хаҥаан халыҥ Хадаары ааттата олороллор диэтэххэ сыыспаппыт. Хадаар тоҕус Герой Ийэтин оҕолорун ыччаттара Хадаарга таһынан, өрөспүүбүлүкэ араас улуустарыгар, куораттарыгар тарҕанан, үлэлии-хамсыы олороллор. Хадаардарынан киэн тутталлар, умнубаттар.
Бу сиргэ ийэ, аҕа солбуйааччыта кинилэр оҕолоро, сиэннэрэ, хос сиэннэрэ буолаллар. Дьиэ кэргэни ытыктаан, убастаан туран, нэһилиэкпит баһылыга Афанасий Афанасьевич Степанов көҕүлээһининэн, кини бырайыагынан тоҕус Герой Ийэҕэ аналлаах кинигэлэр таҕыстылар, кулууппут иннигэр Ийэ скверэ оҥоһулунна.
Ханнык баҕар омук ийэттэн тутулуктаах, ханнык баҕарар омугу ийэ элбэтэр», – диэн этэр биһиги Хадаарбыт нэһилиэгин баһылыга Афанасий Афанасьевич Степанов.
Тоҕус Герой Ийэҕэ анаммыт кинигэ олус интэриэһинэй. Саҕаланыытыгар Герой Ийэлэр төрүччүлэрэ киирбит. Оҕолоро, сиэннэрэ, хос сиэннэрэ ийэлэрин илиитин сылааһын, минньигэс аһын хайдах курдук сылаастык, истиҥник ахталларын, өйдүүллэрин туһунан суруйбуттар. Герой Ийэлэр олохторо кинилэр тапталлара үйэттэн үйэҕэ, сүрэхтэн сүрэххэ бэриллэн уостубата ыччаттара суруйбут ахтыыларыттан көстөр.
Халыҥ Хадаар Герой ийэлэрин туһунан Айна Бандерова кэпсиирин манна көрүҥ https://vk.com/wall-199463452_20153
Алёна КСЕНОФОНТОВА, VII кылаас,
С.Д. Флегонтов аатынан Хадаар орто оскуолата, Чурапчы