Балаҕан ыйын 16 күнүгэр Уус Алдан улууһугар оскуола үөрэнээччилэригэр сүүрүүгэ өрөспүүбүлүкэтээҕи аһаҕас турнир буолан ааста.
Бу турнир өрөспүүбүлүкэ элбэх төгүллээх чөмпүйүөнэ, призера, «Азия оҕолоро» оонньуулар кыттыылааҕа Александра Кырбасова-Заболоцкая сырдык кэриэһигэр ананна.
Семён Дмитриевич Флегонтов аатынан Хадаар орто оскуолатын үөрэнээччилэрэ Владик Давыдов (XI кылаас) 3000 миэтэрэҕэ, Айтал Григорьев 1000 миэтэрэҕэ (VIII кылаас) чемпион үрдүк аатын сүктүлэр. Онтон Байдам Ефимов 500 миэтэрэҕэ уонна 1000 миэтэрэҕэ иккиэннэригэр үһүс миэстэ буолла.
Биһиги үөрэнээччилэрбит бу ситиһиилэрэ тренер Реворий Михайлович Елисеев үлэтин көрдөрүүтэ буолар диэн сыаналыыбын. Эн үлэҕин ис сүрэххиттэн таптыыр, талан ылбыт идэҕэр бэриниилээх буоллаххына, маннык түмүгү ситиһэҕин. Биһиги, хадаардар, саамай үөрбүппүт диэн сүүрүү көрүҥэр саҥа спортсмен оҕолор тахсан эрэллэр.
Алёна КСЕНОФОНТОВА, VII кылаас, Хадаар, Чурапчы