Ахсынньы 17 күнүгэр С.Д. Флегонтов аатынан Хадаар орто оскуолатын юнкордара «Живые голоса ветеранов» документальнай киинэлэрин премьератыгар ыҥырыылаах ыалдьыттар буолан кытынныбыт.
Хадаар оскуолатын дириэктэрэ Тарасов Петр Петрович Тарасов тыл этэн тэрээһини арыйда. Онтон киинэ геройа, үлэ бэтэрээнэ, сэрии оҕото, Ксения Семеновна Игнатьева киинэ дириҥ суолталааҕын бэлиэтээтэ, юнкордар бэркэ түмсэн, улахан үлэни оҥорбуттарын туһунан бэлиэтээтэ.
Юнкордар ааттарыттан 9-с кылаас үөрэнээччитэ Алена Ксенофонтова киинэ дьон дьүүлүгэр тахсан эрэриттэн үөрүүтү биллэрдэ. Бары көмөлөспүт, күүс-көмө буолбут дьонноругар махталларын тиэртэ.
Кинилэр олус маладьыастар, сүрдээх улахан үлэни оҥорбуттар. Оҕо суруналыыстыкатын эйгэтэ сайдыытыгар бэйэлэрин кылааттарын киллэрдилэр диэтэххэ сыыспатым буолуо. Эдэр суруналыыс быһыытынан хас да таһым сайдыбыттара харахха быраҕыллар.
Хадаар юнкордара олус кыһаллан оҥорбут үлэлэрин көрдүбүт. Киинэҕэ Аҕа дойду Улуу сэриитин, Чурапчы көһөрүллүүтүн бэтэрээннэрин, анал байыаннай дьайыы кыттыылааҕын ийэтин интервьюлара киирбиттэр. Хас биирдии ахтыы дууһабытын аймаата. Көрөөччүлэр уйадыйан, сүрэхтэрэ хам тутан, саҥата-иҥэтэ суох көрөн олордулар.
Киинэ кэнниттэн санаа атастаһыы буолла. Биллэр режиссер Михаил Лукачевскай, Николай Егорович Мординов-Амма Аччыгыйа аатынан «Кэскил» оҕо бэчээтин кыһатын сүрүн эрэдээктэрэ Сардаана Анатольевна Матвеева уонна keskil14.ру сетевой таһаарыытын эппиэттиир сэкэрэтээрэ Анна Пантелеймоновна Слепцова оҕолор үлэлэрин ырыттылар, сүбэ-ама биэрдилэр, бэйэлэрин көрүүлэрин, санааларын эттилэр, салгыы үүнэ-сайда туралларыгар баҕардылар.
Онтон киинэҕэ үлэлэспит, күүс-көмө буолбут дьоҥҥо махтал суруктары, өйдөбүнньүк бэлэхтэри туттардылар.
Юнкордар уонна кинилэр салайааччылара, настаабынньыктара дойдубутугар, дьоммутугар-сэргэбитигэр суолталаах тиэмэни таарыйан улахан үлэни оҥорбуттар. Билиҥҥи кэмҥэ сытыы боппуруостары көтөҕүү олус наадалаах. Салгыы өссө да элбэх ситиһии уонна үүнүү-сайдыы кэлэ турдун!
София ГОГОЛЕВА, IX кылаас
Валерия Степанова хаартыскалара, IX кылаас
«Тумус кыһа» медиа-киин, С.К. Макаров аатынан Чурапчы гимназията