Тохсунньу 7 күнүгэр Өлөөкө-Күөл бөһүөлэгин «Күөрэгэй» сынньалаҥ киинигэр алын кылаас кыргыттарыгар «Хаарчаана Куо-2023» куонкурус буолла. Манна 5 кыыс кыттыыны ыллылар. Кырачаан кэрэчээнэлэр 5 араас түһүмэххэ долгуйа кытыннылар.
Ол курдук, 1 түһүмэххэ хаартысканан презентация оҥорон бэйэни билиһиннэрии уонна уус-ураннык, хомоҕойдук үүммүт сылынан эҕэрдэ эттилэр.
2 түһүмэххэ — » Остуоруйа дойдута» ыйытыктарга хоруй.
3 түһүмэххэ — Лайфхак. Туһаныллыбат матырыйаалтан интэриэһинэй туттар тэрил оҥорон таһаарбытын сыанаҕа туран кэпсээһин.
4 түһүмэх — Талааны көрдөрүү.
5 түһүмэх — Дефиле, Хаарчаана көстүүтэ.
Куонкурус түмүгүнэн :
Сулусчаана Куо — Глория Винокурова, 3 кылаас.
Кэрэчээнэ Куо — Аделина Винокурова 3 кылаас.
Мичийээнэ Куо — Люсина Захарова 1 кылаас.
Нарынчаана Куо — Сайнаара Винокурова, 3 кылаас.
Хаарчаана Куо — Сайнаара Винокурова, 1 кылаас буоллулар.
Кыайыылаах буолбут Хаарчаана Сайнаара саамай сөбүлээбит түһүмэҕинэн остуоруйалартан ыйытыктар буолбутун уонна кыттааччылартан 3-с кылаас Сайнаара Винокуроватын сөбүлээбитин туһунан кэпсээтэ.
Кырачаан Хаарчааналар бары көтөх муҥунан бириистэри тутан, үөрэн-көтөн саҥа үүнэр Хоруолук сылын олус көхтөөхтүк көрүстүлэр. Кыргыттарын сир курдук симээн, ох курдук оҥорон кытыннарбыт талааннаах тарбахтаах, көмүс сүүтүктээх күн-күбэй ийэлэрбитигэр махтанабыт.
И. Ноговицына,
Орто Халыма, Өлөөкө-Күөл б.