Олунньу ыйга «Үөрэх тэрилтэлэригэр медиа-студиялары тэрийии» диэн кууруска үөрэнэн, олус элбэх туһалаах лекциялары иһиттим. Интэриэһиргээн, ол кууруска Семён Семенович Посельскайы уонна Кристина Олеговна Иванованы кытта билсэн, “Кэскил” хаһыат “Уолан” рубрикатын кытта ыкса үлэлииргэ сөбүлэҥмин биэрбитим.
Онтон муус устар 7 күнүгэр Семён Семеновичка Дьокуускай куоракка «Кэскил» оҕо бэчээтин кыһатыгар бырайыакпын кэпсэтэ тиийбитим. “Кэскил” хаһыат үлэһиттэрин кытта билсэн-көрсөн кэллим, наһаа үчүгэйдик көрсүбүттэрэ. Ол курдук, суруналыыс Жанна Владимировна Леонтьеваны кытта билсэн, үөрүүм үгүс этэ. Тутатына миэхэ “Бэлэм буол” диэн саҥа сурунаалы көрдөрбүтэ. Сурунаал иһигэр эбии оонньуулаах этэ. Онон уһуну-киэҥи толкуйдуу барбакка, сурунаалы баҕаран туран атыыластым.
Дьиэбэр кэлэн, сурунаалбын аахтым. Наһаа интэриэһиргээтим. Оонньуута букатын интэриэһинэй эбит. Олоҥхо дьоруойдарын фишканан үөрэтии эбит. Бэйэм олонхону үөрэтэр буоламмын, оҕолорбор Олонхо дьоруойдарын үөрэтэрбэр наһаа көмөлөөх буолсу диэн санааҕа кэлбитим.
Урут оҕо сылдьан «Кэскил» хаһыаты олус интэриэһиргээн ааҕарым. Онтон кэлин, бу соторутааҕыта хаһыакка суруйтарар санаа киирэн, «Кэскили» суруйтардым. Жанна Владимировна сурутууну барытын бэйэтэ онлайн толорон, оҥорон биэрбитэ.
«Кэскил» хаһыат аныгы тэтиминэн сайдыбыт-тупсубут. Оҕолорго, төрөппүттэргэ, педагогтарга олус туһалаах суруйуулар баар буолбуттар. Онон Сахам дьонун барыгытын хаһыакка суруйтаран, тускутугар туһаныҥ, диэн ыҥырабын.
«Кэскил» хаһыат, «Кэскил медиа-школа» үлэһиттэригэр барҕа махталбын тиэрдэбин. Түгэнинэн туһанан, сахалыы саҥалаах, Айыы итэҕэллээх сахам дьонун Саха АССР 100 сылынан эҕэрдэлиибин: Айыыһыт Аҕас Хотуммут алҕыы амалыйа турдун, Иэйиэхсиккит эҥээрдэһэн, элэккэй санаатынан эйээрэ турдун! Бу сыл үгүс элбэх үтүөнү аҕаллын, кэскилгитин кэҥэттин, саргыгытын салайдын. Майгылаах бастыҥнара буолуҥ, үтүө санааҕыт күөдьүйдүн, сырдык санаа суолланыҥ, ымсыы санааҕа ылларымаҥ, куһаҕан санааҕа куустарымаҥ, обот санааҕа уйдарымаҥ.
Тот олох тосхойдун, байылыат быйаҥ барҕардын, кэскилгит кэҥээтин, туску туһаайдын, саргы салалыннын. Тапталлаах өрөспүүбүлүкэбит киил маһы тосту олорор толору дьоллон, суон маһы ортотунан тоһутар суон сурахтан. Уруй-Туску буолуохтун!
Анжела Дмитриевна ФИЛИППОВА,
О.П. Иванова-Сидоркевич аатынан Амматааҕы эбии үөрэхтээһин педагога,
Е.А. Шишигин аатынан Сатаҕай орто оскуолатын муусукаҕа учуутала,
Амма улууһа.