“Өлүөнэ очуостара” национальнай пааркаҕа VIII “Азия оҕолоро” норуоттар икки ардыларынааҕы спортивнай оонньуулар уоттара умайда.
Бу күн биһиги оскуолабыт үһүс кылааһын үөрэнээччитэ Ваня Соломонов капсулаҕа угуллубут оонньуу уотун өрөспүүбүлүкэбит Ил Дарханыгар Айсен Сергеевич Николаевка биэрдэ.
“Мин бу тэрээһиҥҥэ кыттан олус диэн үөрдүм. “Азия оонньууларын” уотун тутан, хааман истэхпитинэ — бары көрбүттэрэ, долгуйбутум. Миэхэ сахалыы таҥас биэрбиттэрэ, ону кэтэн кыттыбытым. Бэйэм көҥүл тустуунан уонна хапсаҕайынан дьарыктанабын. “Азия оонньууларыгар” кыттыахпын баҕардым. Хоккей күрэхтэһиитин астына көрбүппүт”, — диэн Ваня Соломонов биһигини кытта санаатын үллэһиннэ.
Бу күн биһиги оскуолабыт бастыҥ спортсменнара Өлүөнэ очуостарыгар сынньаннылар, олус интэриэһинэй тэрээһиҥҥэ сырыттылар. Алексеева Альберта хайыһарга кыайыылаах буолла. Бары хаҥкылаатыбыт, күрэхтэһиини дуоһуйа көрдүбүт
“Азия оонньуулара” спортивнай оонньууну төрүттээччи, Саха сирин бастакы бэрэсидьиэнэ Михаил Ефимович Николаев төрөөбүт дойдутугар Хаҥалас улууһугар оонньуу уота умайан, өрөспүүбүлүкэ бары улуустарынан айанныа.
Бэс ыйын 26 күнүгэр Дьокуускай куоракка кэлэн, “Азия оҕолоро” оонньууну арыйыа.
Туяра Осипова,
М.Е. Васильева аатынан
2-с Малдьаҕар орто оскуолатын медиакиинэ.