Быйыл Хаҥалас улууһугар «Ситиһиигэ 10 хардыы» («10 шагов к успеху») бырайыак үлэлээтэ. Манна барыта улуус 10 оскуолата талыллан кытынна.
Биһиги оскуолабытыттан бу бырайыакка 6, 7, 8 кылаастарга үөрэнэр 10 уол кытынна. Бырайыак былаанынан уолаттар 10 араас тэрээһиннэргэ кыттыахтаахпыт. Үгүс тэрээһин зуум нөҥүө буолбута. Ол курдук полиция инспекторын кытта кэпсэппиппит, улуус көхтөөх үөрэнээччилэрэ эр киһи идэлэрин туһунан билиһиннэрбиттэрэ, робототехника уонна дьиэ дизайнын туһунан маастар-кылаастар буолбуттара, психологы кытта кэпсэтии, урбаанньыты кытта көрсүһүү буолбута.
Биһиги бэйэбит нэһилиэкпитигэр икки тэрээһини ыыттыбыт. Ол курдук “Эдэр булчут оскуолата” диэн тэрээһиҥҥэ биһиэхэ булчут Валентин Дмитриевич Иванов саха атынан кэлэн, саха сылгытын уратытын туһунан кэпсээбитэ. Уолаттар аты миинэн көрбүппүт.
Сыал ытыыга күрэхтэспиппит, грамотанан, минньигэс бириистэринэн наҕараадалаабыттара. Булчут ойуурга хайдах сылдьыахтааҕын, ханнык ыстарааптар баалларын, айылҕа харыстабылын туһунан кэпсээбитэ.
Иккис тэрээһиммит өрүстэн муус ылыыта. Манна биһиги учууталларбыт Руслан Михайлович уонна Альберт Владимирович хайдах муус ыларга үөрэппитэрэ. Биһиги атын дьон ылбыт муустарыгар эбии муус ылан көмөлөспүппүт.
Бу бырайыакка кыттыбыт 10 уолга уонна учууталбытыгар Надежда Петровнаҕа барыбытыгар футболка бэлэхтээбиттэрэ уонна 1 ноутбук биэрбиттэрэ. Уолаттарга аналлаах тэрээһиннэри олус сөбүлээтибит. Өссө да маннык элбэхтэ буоларыгар баҕарабыт.
Дархан ТИХОНОВ, М.Е. Васильева аатынан
2-с Малдьаҕар орто оскуолатын 7 кылааһын үөрэнээччитэ.