Олунньу 1 күнүгэр «Хаҥалас хапсаҕайа» маҥнайгы норуоттар икки ардыларынааҕы турнир саҕаланна!
Хабыр хапсыһыылар икки күн устата «Өрөгөй» успуорт киинигэр ыытыллыахтара. Манна 9 тас дойдуттан: Грузия, Индия, Азербайджан, Беларусь, Кытай, Кыргызстан, Монголия, Узбекистан, Исламскай Республика Иран, Арассыыйа эрэгийиэннэриттэн уонна Саха сириттэн уопсайа 476 бөҕөс кыттыыны ылар.
Маҥнайгы күн 85, 95, 95 киилэттэн үөһэ, бэтэрээннэргэ 80, 90, 90 киилэттэн үөһээ ыйааһыннаахтар киирсиэхтэрэ. Күрэс үөрүүлээх арыллыыта киэһээ 17:00 чааска буолара күүтүллэр. Ол кэннэ 75 кг үөһэ ЯАССР 1954 сыллаах абсолютнай чөмпүйүөнүн, СССР, РСФСР, ЯАССР успуордун маастарын Илья Петрович Кондратьев аатынан Аар Дархан аатын былдьаһар күөн көрсүһүүлэр саҕаланыахтара. Кыайыылаах чочуллан оҥоһуллубут саха батыйатын, бэдэр ойуулаах курунан, бриллианнаах мэтээлинэн наҕараадаланар. Ону таһынан спецприз быһыытынан 500 тыһыынча солк. туруоруллубут. Бастакы күн 6 мэтээл комплега оонньонор.
Хапсаҕай сахалар төрүт көрүҥмүт буолар. Түҥ былыргыттан баар буолан чопчу хаһан төрүттэммитэ биллибэт. Олоҥхоҕо биллэринэн Орто Дойду дьоно аллараа дойду атамааннарын хапсаҕай албастарын туһанан кыайаллар эбит. Былыр хапсаҕай ыһыахтарга, урууларга, муҥхаҕа, ат сүүрдүүтүгэр эрэ ыытыллар эбит буоллаҕына, билигин араас хабааннаах күрэхтэһиилэр тэриллэллэр. Кэлин төрүт көрүҥмүт сайдан аан дойдуга аатырыан аатырда, онон бу сылга норуоттар икки ардыларынан ыытыллан эрэр.
Былыргы сылларга хапсаҕай бириэмэнэн хааччаҕа суоҕа, утарылаһааччыҥ сири таарыйыар диэри хас да чаас ыытыллыан сөп. Мөккүһүүлээх түгэн баар буоллаҕына, биир күн, оннооҕор сарсыныгар диэри буолар эбит. Кыайыылаахха мүһэни туттараллара.
Бүгүҥҥү быраабыланан тарбахтан ураты ханан баҕарар тутуһуохха сөп, көбүөрү таарыйдыҥ да туоруугун, хапсыһыы 4 мүнүүтэ тохтобула суох ыытыллар, бэтэрээннэргэ 3 мүнүүтэ. Хапсаҕайдьыттар сүрүннээн «түргэн» — утарылаһааччы атаҕыттан уонна төбөтүттэн тутан охторуу,»халбарыйан тэбии» уонна «халбарыйыы» — атахха киирэн түөскүнэн көтөҕөн быраҕыы көрүҥнэрин туһаналлар.
Хапсаҕай туох да ыарахан быраабылата суох буолан, үгүс сир-дойду спортсменнарын сэҥээритин ылан киэҥ араҥаҕа билиннэ. Атын норуоттар бэйэлэрин көрүҥнэригэр майгыннаталлар ,холобура, «куреш» түүр норуоттар хапсыһыыларыгар.
Турниртан ыраас, киһини сэҥээрдэр, түргэн туттуулаах хапсыһыылары күүтэбит!
Анжелина Жданова, ХИФУ устудьуона.
keskil14.ru