Бу күннэргэ Саха сиригэр икки төгүллээх олимпийскай чемпион, Аан дойду үс төгүллээх чемпиона, греко-римскай тустууга Арассыыйа спордун үтүөлээх маастара Роман Власов ыалдьыттаата.
Роман Власов биһиги биллэр тустуукпут Виктор Рассадин үтүө доҕоро, Виктор үөһэ тахсарыгар, маастарыстыбатын бөҕөргөтөрүгэр Роман үтүөтэ элбэх диэн тустуу сүгүрүйээччилэрэ да, спортсменнар да этэллэр.
Дьокуускай куоракка Роман Власов «Модун» спортивнай саалатыгар эдэр бөҕөстөрү кытары көрүстэ уонна маастар-кылаас көрдөрдө. Маны таһынан СӨ спордун миниистирэ Леонид Спиридонов ыҥырыытынан Покровскай куоракка тахсан оҕолору — эдэр тустууктары кытары көрүстэ.
М.Е. Васильева аатынан 2-с Малдьаҕар орто оскуолатын 3 кылааһын үөрэнээччитэ Влад Громов көрсүһүүгэ сылдьан астынан кэлбит:
— Мин Покровскай куоракка икки төгүллээх олимпийскай чемпион Роман Власовы кытта көрсүһүүгэ сылдьан кэллим. Улахан Аантан 12 уол буолан барбыппыт.
Роман Власов элбэхтэ дьарыктаныҥ, кыайтардаххытына да хомойумаҥ, кыайтарыыгытын ааҕымаҥ диэн эппитэ. Элбэх оҕону кытта киирсэн кыайдаххытына, онтон ордук үөрүөххүт диэбитэ.
Олимпиадаҕа кыайбыт мэтээллэрин биһиэхэ көрдөрбүтэ. Бары илиибитигэр тутан көрбүппүт. Оҕолорго футболка, флаер бэлэхтээбитэ. Мин Роман Власовы күүстээх киһи дии санаатым.
Эдэр бөҕөстөр икки төгүллээх олимпийскай чемпион Роман Власовы кытары көрсүһүү кэнниттэн чөмпүйүөн буола үүнэр ыра санаалара өссө күүһүрдэ.
Бэлэмнээтэ Анна СЛЕПЦОВА.