Хаһааччыйа орто оскуолатыгар VII-XI кылаас оҕолорун ортотугар теннискэ күрэхтэһии буолан ааста.
Күрэхтэһии Усуйаана улууһугар Үлэ дьоруойдарын уонна Саха өрөспүүбүлүкэтигэр Ийэ сылыгар анаан тэрилиннэ. Тэрээһини физкультура учуутала Василий Васильевич Готовцев, эбии үөрэхтээһин уһуйааччылара Николай Петрович Дмитрьев уонна Уйгулан Нюргустанович Аммосов иилээн-саҕалаан, бэйэлэрэ спонсордаан, ыыттылар. Күрэхтэһиигэ үксүн уолаттар кыттыыны ыллылар.
Олус сытыы уонна күүстээх киирсии түмүгэр кыайыылааҕынан X кылаас үөрэнээччитэ Николай Макаров таҕыста.
XI кылаастан Лебедев Александр, Максим Кудринов иккис-үһүс буоллулар. Призер уолаттар грамотанан уонна сыаналаах бириистэринэн наҕараадаланнылар.
«Кыайыыга дьулуур» анал аат хаһаайына Попов Максим, VII кылаас, буолан, үөрүүтэ үрдээтэ, “өссө күүскэ дьарыктаныам”диэн эрэл санаатын ыһыктыбат.
Алтынньы ый 15 күнүттэн «Месячник психологического здоровья» диэн чөл олох, бөҕө туруктаах уйулҕа тиэмэтигэр анаммыт үлэ ити курдук саҕаланна. Аны биир ый устата нэдиэлэ аайы спортивнай оонньуу, күрэхтэһии, уйулҕа дьарыктара, чэгиэн- чэбдик олоххо уһуйар көрсүһүүлэр салҕанан бара туруохтара.
Кира Слепцова, Анжелика Анисимова, «Дьааҥы кыымнара» пост эдкордара.
Хаһааччыйа, Усуйаана.