Хаһааччыйа орто оскуолатыгар Саха Өрөспүүбүлүкэтин Бастакы Президенэ М. Е.Николаев 85 сааһын көрсө үрдүкү кылаас оҕолоругар аналлаах «Мин дойдум кэлэр кэскилэ» диэн гражданскай форум буолан ааста. Бу үөрүүлээх түгэни Саха өрөспүүбүлүкэтин Өрөгөй ырыатынан саҕалаатыбыт.
Хаһааччыйа орто оскуолатын иитэр үлэҕэ дириэктэри солбуйааччы Горохова Розалия Николаевна алгыс тылынан арыйда. Оҕолорго анаан М.Е.Николаев айбыт, суруйбут үлэтин, бэчээккэ тахсыбыт кинигэлэрин көрдөрөн билиһиннэрдэ. Үөрэнээччилэр олус интэриэһиргээтилэр, «инникитин билэ-ааҕа сылдьыахпыт» диэн эттилэр. Маны таһынан, Розалия Николаевна туйгун үөрэхтээх, олоххо актыыбынай, оҕо общественнай тэрилтэтин лидэрдэрин эҕэрдэлээтэ уонна махтал суругу туттарда. Хаһааччыйа орто оскуолатыгар үөрэммит М. Е.Николаев аатынан лауреаттары билсиһиннэрэн, оҕолору инники ситиһиилэргэ кынаттаата.
Форум иккис түһүмэҕэр оҕолор М. Е.Николаев олоҕун, айар үлэтин туһунан оскуолаҕа оҕо хамсааһынын тьютора Аммосов Уйгулаан Ньургустанович көрдөрөр-иһитиннэрэр тэрил көмөтүнэн сиһилии билиһиннэрдэ, онтон оҕолор тус санааларын истэн, билиилэрин хаҥаттылар. Саха норуотугар муҥура суох бэриниилээх Ытык киһиэхэ оҕолор махтанан, олохторугар мэлдьи холобур буолуохтааҕын бэлиэтээтилэр.
Үлэ үһүс түһүмэҕэр педагог-организатор Аммосова Васирита Васильевна оҕолорго айар үлэҕэ угуйар аналлаах «Толкуйдаа. Оонньоо. Кыай» диэн Саха өрөспүүбүлүкэтин бастакы Президенигэр анаммыт өркөн өй оонньуутун ыытан, оҕолор үөрүүлэрэ үрдээтэ.
Хаһааччыйа орто оскуолатыгар «Пульс» («Тэтим») Оҕо өрөспүүбүлүкэтин түстүүр педагог-организатор Аммосова Васирита Васильевна, дириэктэр сүбэһитэ Григорьева Мария Георгиевна, тьютор Аммосов Уйгулан Ньургустанович, музыкальнай үлэһит Дмитрьев Николай Петрович көмөлөрө улахан.
Бу өрөгөйдөөх күҥҥэ үрдүкү кылаас үөрэнээччилэрэ бука-бары көхтөөх кыттыыны ылан, билиилэрин чиҥэтэн, айар үлэ умсулҕаныгар уйдаран, аны эбии тус санааларын суруйан аҕалыах буоллулар.
Түмүгэр Михаил Ефимович Николаев эдэр ыччакка анаан тыл этэрин видеоҕа көрдүбүт уонна Бастакы Бэрэсидьиэн туһунан В.Григорьев тылыгар, А.Егоров мелодиятыгар «Махтал ырыата” сүгүрүйэн туран иһиттибит.
М.Е.Николаев олоҕо, айар үлэтэ, норуотугар муҥура суох тапталын туһунан кинигэлэрэ, олоххо ситиһиилэрэ — бу барыта Саха Сирэ сайдарыгар улахан кылаатын уурбут Ытык Киһи буоларын туоһулуур. Биһиги, үөрэнээччилэр, Ытык Президент олоҕун билсиһэн, саҥаны истэн-көрөн, сырдык, сылаас иэйиигэ бигэнэн, үөрэхпитигэр, тус олохпутугар холобур оҥостуохпут, өрүү махтана саныахпыт диэн бигэтик эрэнэбит
Анжелика Анисимова, Х кылаас, Надежда Аммосова, VIII кылаас. «Дьааҥы кыымнара» эдкорпост.
Хаһааччыйа, Усуйаана.