Биһиги, “Кэскил” медиа-оскуола юнкордара, Танда үрэх сүнньүгэр турар түөрт чулуу Геройдаах, баай историялаах Байаҕантай нэһилиэгин ыалларыгар Готовцевтарга ыалдьыттаатыбыт.
Ыал аҕата Роман Романович илиитигэр талба талааннаах. Кини баһаарынай чааска караул начальнига. Онтон ыал ийэтэ Вероника Васильевна күөх Ньурба улууһуттан төрүттээх, М.Н. Готовцев аатынан Танда орто оскуолатын дириэктэри үөрэх өттүгэр солбуйааччы. Үс оҕолоохтор. Улахан уол Арсиэн 12 саастаах, кыыстара Вера 10 саастаах, кыра уол Артем 7-тэ.
Тыа ыала буолалларын быһыытынан сүөһү, сылгы иитиитинэн дьарыктаналлар. Оҕолорун от-мас үлэтигэр сыһыараллар, тэҥҥэ илдьэ сылдьан бэйэлэрин холобурдарыгар иитэллэр.
Ыал аҕата уолаттарыгар бултааһын араас көрүҥүн көрдөрөр. Айылҕаҕа сиэр-туом тутуһуутун үөрэтэр. Ону таһынан уолаттарын кытта уһанан, дьиэ ис-тас көстүүтүгэр аналлаах дьэрэкээн оҥоһуктары оҥороллор.
Ийэлэрэ кыыһын кытта ас астааһынынан, үүнээйи олордуутунан, уруһуйунан, оҕуруонан тэҥҥэ дьарыктаналлар.
Сайын аайы тиэргэн иһиттэн битэмииннээх, өлгөм үүнүүнү, оҕуруот аһын ылаллар. Сааһын чучунаах хомуйуута, сайынын дьэдьэннээһин, күһүнүн отоннооһун – Готовцевтар ыал саамай күүтүүлээх кэмнэрэ.
Дьыл кэмэ уларыйарын курдук, биһиги дьиэ кэргэн ситимнээхтик сиэттиһэн олохпут кэрэ күннэрин бары бииргэ атаарабыт, – диэн этэллэр Готовцевтар дьиэ кэргэн.
Готовцевтар дьиэ кэргэн туһунан кэпсиир видеобытын манна киирэн көрүҥ https://vk.com/wall-199463452_22908 Сүрэх баттыыргытын, комментарий суруйаргытын умнумаҥ.
Валерия ГОТОВЦЕВА, Х кылаас,
М.Н. Готовцев аатынан Танда орто оскуолата, Уус Алдан
Видео, монтаж: Туйаара Мамонтова, IX кылаас