Олунньу ый 11 күнүгэр, Горнай улууһун Аһыма бөһүөлэгин Кировскай орто оскуолатыгар аһаҕас Өрөспүүбүлүкэтээҕи «Аһыма кубога» биирдиилээн уонна хамаанданан Хотугу многоборье биир сүрүн көрүҥэр — «Түргэн наарта» күрэҕэ Горнайга аан бастакытын буолан ааста.
Күрэххэ саастарынан 4 бөлөххө арахсан кытыннылар:
- 9-с уонна онтон кыра саастаах уолаттар, кыргыттар;
- 10 — 11 саастаах уолаттар, кыргыттар;
- 12 — 13 саастаах уолаттар, кыргыттар;
- 14 — 15 саастаах уолаттар, кыргыттар;
Дьокуускайтан «Модун» спортивнай комплекс иитиллээччилэрэ (тренер А.Г. Сыромятников), Бүлүүттэн (тренердар В.В.Евсеев, И.А.Анисимов), Үөһээ-Бүлүүттэн (тренер Р.В.Григорьева), Уус-Маайаттан (тренер А.Д.Иванов), Горнайтан Одуну (тренер И.И.Горохов), Маалтааны (тренер Г.Г.Григорьев), Кировскай (тренердар В.В.Ефремов, А.А.Антонова) оскуолатын хамаандалара уопсайа 88 күрэхтэһээччи кытынна. Тэрээһин саҕаланыытыгар Хотугу многоборье старшай тренера, Саха республикатын үтүөлээх тренера, Россия спордун маастара — Сыромятников Анатолий Гаврильевич кыттааччыларга уонна тэрийээччилэргэ ситиһиилэри баҕаран туран махталын тиэртэ. Салҕыы Горнай улууһун үөрэх салаатын иитии уонна эбии үөрэхтээһин сүрүннүүр специалиһа — Степан Константинович
Пахомов, Кировскай нэһилиэгин баһылыгын солбуйааччыта — Аргунова Саргылаана Викторовна уонна Кировскай орто оскуолатын дириэктэрэ — Алексеев Илья Егорович кыттааччыларга туһаайан тыл эттилэр. Осипов Афанасий аатынан Бэрдьигэстээх орто оскуолатын «Дохсун дорҕоон» этно-фольклорнай бөлөх күрэҕи киэргэттэ (сал. Николаева Надежда).
Хамаанданнан күрэх түмүгэр:
1 миэстэ — Үөһээ Бүлүү
2 миэстэ — Дьокуускай (Модун)
3 миэстэ – Бүлүү улуустара наҕараадаланнылар.
Кировскай орто оскуолатын эдэр учууталлара туруорбут анал бириистэрин туттулар:
- «Кырачаан кыттааччы»- Ловцова Эмилия, (Модун);
- «Кэскиллээх кыттааччы»- Протасова Сайдыына, (Горнай, Аһыма);
- «Эрчимнээх кыттааччы»- Григорьев Марк, (Горнай, Кэптин);
- «Кыайыыга дьулуур»- Кардашевская Анита, (Горнай, АҺыма).
Күрэҕи Кировскай орто оскуолатын кэлэктиибэ тэрийэн ыытта.
Хотугу многоборье көрүҥэ «Түргэн наарта» Саха өрөспүүбүлүкэтин историятыгар аан бастакытын биирдиилээн уонна хамаанданан күрэҕэ Кировскай орто оскуолатын эдэр кэскиллээх физкультура учуутала, хотугу многоборьеҕа спорт маастарыгар кандидат Ефремов Василий Васильевич көҕүлээһининэн уонна Кировскай орто оскуолатын кэлэктиибэ, Аһыма бөһүөлэгин дьоно-сэргэтэ, Саха сирин үтүөлээх тренера Сыромятников Анатолий Гаврильевич быһаччы өйөбүллэринэн үрдүк тэрээһиннээхтик ыытылынна. Кэлбит ыалдьыттар, күрэхтэһээччилэр сүрдээҕин астынан, сыаналаах бириистэри тутан, үөрэн-көтөн бардылар. Өссө да инникитин түргэн наарта «Аһыма кубога» күрэҕэ ыытылла турарыгар баҕа санааларын эттилэр.
МБОУ Кировская СОШ МР
Горный улус