2026 сыл Горнай улууһугар Доруобуйа сылынан биллэриллибитэ. Сыл устата доруобуйа харыстабылыгар туһааннаах араас хабааннах тэрээһиннэр, үлэлэр ыытыллыахтара.
Кулун тутар 6 күнүгэр Сэмэн Петрович Данилов аатынан Бэрдьигэстээх орто оскуолатын «Сайдам» медиакиин эдэр кэрэспэдьиэннэрэ Кирсан Кириллов уонна Иван Петров Горнайдааҕы киин балыыһа сүрүн бырааһын Егор Петрович Григорьевы кытары көрүстүбүт. Кини биһиэхэ туох үлэлэр саҕаламмыттарын туһунан сиһилии кэпсээтэ, билиһиннэрдэ.
Улуус сүрүн бырааһа «Доруобуйа» национальнай бырайыак, ол чэрчитинэн туох үлэлэр ыытыллыбыттарын, диспансеризация үлэтин, нэһилиэк хабыллыытын уонна түмүктэрин, ону таһынан «Земскэй доктор» бырагыраамма, төһө элбэх испэсэлиис үлэлии кэлэрин, оҕо төрөөһүнүн уонна босхо эмп ыларга туох ирдэбиллэр баалларын туһунан биһиэхэ сиһилии сырдатта, ыйытыыларбытыгар барытыгар хоруйдаата.
Егор Петрович «Доруобуйа» национальнай бырайыак туһунан бу курдук кэпсээтэ:
Улууспут дьаһалтата быйыл Доруобуйа сылын биллэрдэ. Биһиги улууспут дьаһалтатын кытта ыкса үлэлээн, олохтоохтор доруобуйалара тупсарын, көрдөрүнүү баар буоларын туһугар күүскэ үлэлээн, араас бырайыактары олоххо киллэрэн эрэбит. Ол курдук, «Доруобуйа» национальнай бырайыак туһунан кэпсээтэххэ, бу бырайыак чэрчитинэн Маалтааны нэһилиэгин Кэптин сэлиэнньэтигэр саҥа врачебнай амбулатория тутуллубута. Ону таһынан массыынанан хааччылыылар бааллар, саҥа лабораторнай тэриллэр кэлэллэр, бу эмиэ барыта нац.бырайыак көмөтүнэн буолар. Өссө биир сүрүн бырагыраамманан «Активное долголетие» буолар. Бырагыраамма чэрчитинэн, аҕам саастаахтары диспансеризациялаан, доруобуйаларын туруктарын үөрэтэн, ыарыылары билэн, эрдэттэн эмтээһин үлэтин ыытыахтаахпыт.
Билиҥҥи кэмҥэ доруобуйа хас биирдии киһиэхэ бастакы күөҥҥэ турар. Киһи доруобуйатын күүскэ көрүнэр, харыстанар, эрдэттэн быраастарга көрдөрүнэр, эмтэнэр буолла. Маннык хамсааһыны оскуолаларга эмиэ көхтөөхтүк кэпсииллэр, киллэрэллэр уонна наадалааҕын тоһоҕолууллар. Онон оскуола үөрэнээччитэ эмиэ туох бырайыактар баалларын, ханнык бырагырааммаҕа хапсыахха сөбүн билэ-үөрэтэ сылдьыахтаах дии саныыбыт. Олох, медицина хаамыытын кытары тэҥҥэ сайдан иһиэхтээхпит. Бу барыта биһиги инники идэбитин да таларбытыгар, көннөрү билиилээх-көрүүлээх буоларбытыгар наада.
Сиһилии видео-матырыйаалга көрүҥ:
Кирсан Кириллов, Иван Петров, С.П. Данилов аатынан Бэрдьигэстээх орто оскуолатын 8 кылааһын үөрэнээччилэрэ, «Сайдам» медиа-киин кэрэспэдьиэннэрэ, Горнай