Бүгүн, от ыйын 4 күнүгэр, Дьокуускай куоракка VIII «Азия оҕолоро» норуоттар икки ардыларынааҕы спортивнай оонньууларын чэрчитинэн «От Международных спортивных игр «Дети Азии» к университетскому спорту» научнай конференция ыытылла турар. Бу улахан тэрээһин Чурапчытааҕы судаарыстыбаннай физическай култуура уонна спорт институтун 25 сылыгар уонна ахсыс «Азия оҕолоро» оонньууларыгар ананар.
Конференцияҕа оройуон баһылыктара эмиэ кыттыыны ылаллар. Биир дойдулаахпын, Горнай улууһун аҕа баһылыга Никита Викторович Андреевы көрсөн кэпсэттим уонна биһиги улууска маассабай спорт сайдыытын туһунан туоһуластым.
— Горнай улууһугар спордунан утумнаахтык дьарыктанар киһи ахсаана сыллата элбээн иһэр. Бу научнай конференцияҕа сүрүннээн Российскай Федерация спордун Министиэристибэтэ нормативын ирдэбилинэн спортивнай инфраструктураны элбэтэргэ үлэ ыытылларыгар уонна оройуон кииннэригэр бассейннар, кыһыҥҥы көрүҥнэргэ катоктар баар буолалларыгар этии киллэрэбит. Ону тэҥинэн хас биирдии эрэгийиэҥҥэ буола турар тэрээһиннэргэ кыттар баҕа санаалаахпыт, холобур, «Лыжня России», «Кросc нации» федеральнай таһымнаах тэрээһиннэргэ биир кэлим форма дуу, эбэтэр атрибутика баар буоларыгар этиилээхпит. Бу маннык хабааннаах спорт тэрээһиннэригэр кыттарбыт спорду таптыырбытын көрдөрөр уонна биир улахан хамсааһын быһыытынан буолуо диэн өйдөбүллээхпит. Бүгүҥҥү научнай конференция түмүктэринэн маассабай спорт сайдарыгар үчүгэй этиилэр киирэннэр, өрөспүүбүлүкэбит, дойдубут спорт министиэристибэлэригэр инники үлэлэригэр-хамнастарыгар сөптөөх быһаарыылары ылыныахтара диэн улахан эрэллээхпит.
Биир бэйэм биһиги, Горнайдар, спорду таптыыбыт уонна өрө тутабыт диэхпин баҕарабын. Аҥардас үс сыл анараа өттүгэр буолбут 21-с «Манчаары оонньуулара» ону туоһулуур.
Корреспондент Антон Белолюбскай суруйуута.
keskil14.ru