Тохсунньу 30 күнүгэр С.К Макаров аатынан Чурапчы Гимназиятыгар улуустааҕы баскетбол күрэҕэ буолла. Барыта 6 хамаанда күөн көрүстэ. Сүрүн суудьуйанан гимназия физкультураҕа учуутала Николай Николаевич Романов үлэлээтэ.
Онон оскуолабыт спорт саалатыгар уоттаах-төлөннөөх оонньуулар аастылар. Бу күрэххэ араас оскуолалар хамаандалара көрсүһэн күүстээх киирсиилэри бэлэхтээтилэр. Күрэх олус кэрэхсэбиллээх уонна умсугутуулаах буолан, көрөөччүлэргэ элбэх үөрүүнү, долгуйууну аҕалла. Кыттааччылар бары күүстэрин, дьулуурдарын, сатабылларын сөптөөхтүк көрдөрдүлэр.
Биһиги спортсменнартан интервью ыллыбыт.
Саян Челбердиров, И.М. Павлов аатынан Чурапчы орто оскуолатын хамаандата:
– Бу күн олус үчүгэйдик ааста. Иккитэ кыайдыбыт. Үчүгэйдик оонньоотубут дии саныыбын. Оҕолорго спордунан дьарыктаныҥ диэн сүбэлиибин.
Айхал Шестаков, С.К. Макаров аатынан Чурапы гимназиятын хамаандата:
– Кыайыыбытыттан олус үөрдүбүт. Аан маҥнайгыттан кыайыыга дьулуһан күүскэ оонньообуппут. Бэрт тыҥааһыннаах оонньуулар буоллулар.
Айсан Скрябин, С.А. Новгородов аатынан Чурапчы орто оскуолатын хамаандата:
– Интэриэһинэй оонньуулар аастылар. Төһө да хоттордорбут, оонньооммут астынныбыт. Тэрийээччилэргэ махталбытын тиэрдэбит.
Коля Захаров, И.Е. Федосеев-Доосо аатынан Дириҥ орто оскуолатын хамаандата:
– Наһаа үчүгэй кун ааста. Бары бэлэмнэнэн баран кэлбиттэр күрэхтэһиигэ. Биһиги үһүс миэстэни күүстээхтик ооонньоон ыллыбыт!
Эрчим Романов, С.К. Макаров аатынан Чурапы гимназиятын хамаандата:
– Бэрт күн улаатан-үүнэн ааста. Кыайыыга эрэллээх кэлбиппит. Сөбүлээн оонньуур көрүммүтүгэр бастааммыт киэн тутуннубут. Аны 11-с кылаас буоламмыт БКЭ-битигэр күүскэ бэлэмнэнэр буоллахпыт.
Иван Лукин, С.К. Макаров аатынан Чурапы гимназиятын хамаандатын хамандыыра:
– Хамаандалар икки бөлөҕүнэн арахсан оонньоотубут. Биһиги бэйэбит бөлөхпүтүгэр тахсан кэлбиппит. И.М. Павлов аатынан Чурапчы оскуолатын хамаандатын кытта күөн көрсүбүппүт. Күүстээх хамаанда буолан ыарахан этэ. Онтон Хатылылары кытта оонньообуппут. Эмиэ күүстээх, үчүгэй баҕайы хамаанда. Полуфиналга Сылаҥнары кытта күөн көрсүбүппүт.
Хамаандам оонньуутуттан олус астынным. Аһыллан бэрткэ оонньоотубут. Сүүрэн-көтөн, хамнанан этиҥ-сииниҥ күүскэ эрчиллэр. Түргэнник толкуйдуурга кытта туһалаах. Доҕотторгун кытта оонньоон бириэмэ атаарарыҥ олус үчүгэй.
Маны таһынан биһиги оҕолортон баскетболунан тоҕо сөбүлээн дьарыктаналларын туоһуластыбыт.
Бу курдук, гимназиябыт хамаандата кыайыылаах буолан таҕыста. И.М. Павлов аатынан Чурапчы орто оскуолатын хамаандата 2 миэстэ буолла. Оттон 3 миэстэҕэ И.Е. Федосеев-Доосо аатынан Дириҥ орто оскуолатын хамаандата таҕыста. Ону таһынан чаҕылхай оонньооччуларга анал ааттары туттардылар.
Бары оскуолалар эдэр спортсменнара хамаанданан биир киһи курдук үлэлээтилэр, бэйэ-бэйэлэрин өйүүллэрэ тута көстөр. Кинилэр хорсун санаалара, күүстээх дьулуурдара, үчүгэй бэлэмнээхтэрэ чаҕылхайдык көһүннэ диэн этиэхпин баҕарабын.
Альмира РОМАНОВА, Х кылаас, “Тумус кыһа” медиа-киин,
С.К. Макаров аатынан Чурапчы гимназията
Видео Таня Новгородова, Дайаана Захарова,
Винея Барашкова хаартыскалара