Быйыл С.К. Макаров аатынан Чурапчы гимназиятыгар барыта 59 оҕо туттарсыбыт. Саҥа үөрэнээччилэрбит уустук тургутууну ааһан, гимназист үрдүк аатын чиэстээхтик сүктүлэр.
5-с кылааска 48 оҕо киирдэ. 5 «А» кылаас салайааччытынан саха тылын уонна литературатын учуутала Сардаана Николаевна Гоголева буолла. Оттон 5 «Б» кылаас салайааччытынан математика учуутала Кыдана Михайловна Екечьямова ананна. Гимназистар сүһүөхтэригэр туран гимназист андаҕарын эттилэр.
Чаҕылхай нүөмэрдэри бэлэмнээбиттэр. Кинилэри Саха Өрөспүүбүлүкэтин үтүөлээх учууталлара, настаабынньыктар, Учууталлар Учууталлара Фекла Николаевна Болдовская уонна Марина Николаевна Керемясова, гимназия дириэктэрэ Юрий Михайлович Слепцов, төрөппүт, Чурапчы улууһун баһылыгын тутууга уонна архитектураҕа солбуйааччыта Афанасий Николаевич Дьячковскай, «Гимназия Республиката» Бастакылар сэбиэттэрин бэрэссэдээтэлэ Лилия Бурцева эҕэрдэлээтилэр.
Оҕолор гимназистар буолбуттарыттан олус үөрбүттэр. Кинилэри көрөн киһи сүргэтэ көтөҕүллэр. Саҥа доҕотторбутун өссө төгүл истиҥник эҕэрдэлиибит! Сырдыкка, кэрэҕэ, үтүөҕэ тардыһыҥ, кыайыылаах-хотуулаах, ситиһиилээх буолуҥ диэн алгыс тылбытын аныыбыт.
Катя МОНАСТЫРЕВА, VIII кылаас, «Тумус кыһа» медиа-киин,
С.К. Макаров аатынан Чурапчы гимназията
Видео Саина Захарова, монтаж Афоня Местников,
ыытааччы Полина Пинигина, VIII кылаас