Лөгөй орто оскуолатыгар үөрэх дьыла саҕаланыаҕыттан Россия үрдүнэн хас биирдии үөрэнээччигэ төрөөбүт дойдуга тапталы иҥэриигэ, төрөөбүт дойдунан киэн туттууга, патриотическай өйдөөх-санаалаах буоларга Россия үрдүнэн биир тиэмэнэн, биир киэбинэн нэдиэлэ бастакы күнүгэр «Дьоһуннааҕы кэпсэтии» кылаас чаастара тэрээһиннээхтик ыытыллаллар.
Биһиги патриоттуу өйдөөх-санаалаах буолан иитиллэн тахсарбытыгар, кылааспыт салайааччыта Т.М. Петухова уонна төрөппүттэрбит көҕүлээһиннэринэн «От аллеи Героев к поиску истоков героизма» диэн бырайыагынан үлэлииргэ былааннанныбыт. Бырайыакка биһиги кылаас Геройдар аллеяларын аҕыс Геройун билсэр сыаллаах, Геройдар төрөөбүт дойдуларыгар сылдьан, кинилэргэ аналлаах мусуой-дьиэлэргэ, аймахтарын уонна оскуола оҕолорун кытта көрсүһүүлэри тэрийэн, матырыйааллары хомуйан, 2023 сылга бырайыакпыт үлэтин түмүктээн, электроннай кинигэ оҥорон таһаарыахпыт.
Бырайыакпыт бастакы суолун арыйан, ахсынньы 9 күнүгэр бэлиэтэнэр Россия Геройдарын күннэригэр аналлаах тэрээһин чэрчитинэн, биир дойдулаахпыт, Уус Алдан улууһун Бочуоттаах олохтооҕо, икки «Ленин», «Бочуот знага» уордьаннар кавалердара, «Сиэрпэ уонна Өтүйэ» кыһыл көмүс мэтээл хаһаайката, Социалистическай Үлэ Геройа Анастасия Семеновна Копырина үлэттэн Герой буолбут дойдутугар, Даалы бөһүөлэгэр «Киэн туттабыт, Үлэ Дьоруойунан!» диэн тиэмэлээх көһө сылдьар кылаас чааһыгар Герой Настаа мусуой-дьиэтигэр баран кэллибит.
Кылаас чааспыт «Классные встречи» киэбинэн В.Е. Заболоцкая Герой Настаа туһунан мусуой-дьиэ матырыйаалларынан уонна Даалы бөһүөлэгин историятын М.И. Борисова кэпсээннэрин, А.С. Копыринаны кытта өр сылларга бииргэ үлэлээбит ыанньыксыт С.С. Петухов ахтыытын сэҥээрэ иһиттибит. Харда тылга бырайыакпытын иһитиннэрдибит уонна сахалыы астаах төгүрүк остуол тула олорон, А.С.Копырина 2023 сыл балаҕан ыйын 6 күнүгэр Социалистическай Үлэ Геройа буолбута 50 сылын бэлиэтиир тэрээһиннэри ыытарга күүс-көмө буоларга былааннарбытын билиһиннэрдибит.
Кылаас чааспыт иккис чааһыгар олохтоохтору кытта сахалыы остуол оонньууларыгар уонна араас куонкурустары тэрийэн, көхтөөх сынньалаҥы тэрийэн, олохтоохтору кытта өссө чугастык билистибит, үөрдүбүт-көттүбүт.
Түмүккэ, кыайыылаах үлэнэн дьолломмут, чулуу ыанньыксыт, Үлэ Геройа Анастасия Семеновна Копырина албан аата көлүөнэттэн көлүөнэҕэ үйэ-саас тухары ааттана туруоҕар баҕарабыт!
Биһиги, инники ыччаттар, Геройдар оҥорбут үтүө дьыалаларын умнубат буоларбытыгар интэриэһинэй кылаас чааһын тэрийбит кылааспыт салайааччыта Татьяна Михайловна Петуховаҕа уонна төрөппүттэрбитигэр махтанабыт!
Дарина Бурнашева, Аяна Решетникова,
Лөгөй орто оскуолатын IX “Б” кылааһын үөрэнээччилэрэ, Уус Алдан.