Дойдубут «Биир Ньыгыл Россия» баартыйатын көҕүлээһининэн 2018 сылтан олоххо ситиһиилээхтик киирбит «Герой паартата» үөрэхтээһин бырайыагын чэрчитинэн биһиги оскуолабытыгар дьоһуннаах уонна долгутуулаах тэрээһин буолла.
Бу күн Ийэ дойдуларын көмүскээһиҥҥэ хорсун быһыыны көрдөрбүт оскуолабыт выпускниктара Николай Скрябин уонна Егор Шишигин ааттарынан «Герой паарталарын» арыйдыбыт. Үөрэнээччилэр остуолларыгар Герой хаартыската, кини олоҕун суолун, хорсун быһыыларын туһунан иһитиннэрии түмүлүннэ. Маннык паарталар оҕолорго үөрэххэ ситиһиини, Ийэ дойдуга тапталы уонна дойдуһа киһи буолууну угуйуохтара.
Көрсүһүүгэ паарталары арыйыыга Егор Шишигин күн күбэй ийэтэ Анастасия Ивановна, кылааһын салайааччыта Зинаида Трофимовна уонна кини бииргэ үөрэммит доҕотторо, Николай Скрябин кылааһын салайааччыта Татьяна Васильевна уонна бииргэ үөрэммит доҕотторо, анал байыаннай дьайыы кыттыылаахтара, бэтэрээннэрэ уонна бэтэрээннэрин Сэбиэтин чилиэннэрэ Михаил Тимофеев уонна Аман Устинов, Майа сэлиэнньэтин баһылыгын бастакы солбуйааччыта Дмитрий Игнатьев кыттыыны ыллылар. Кинилэр бары биһиги Геройдарбытын ахтан-санаан, эдэр ыччакка дойдунаат уруогун биэрдилэр, билии уонна үлэ суолтатын тоһоҕолоон бэлиэтээтилэр.
Николай Скрябин аатынан «Герой Паартата» ОБЗР кабинетыгар ананна уонна манна үөрэнээччилэртэн бастакынан олорор бочуоттаах быраап бэрилиннэ:
1.Дархан Никифоровка, 11 «Б» кылаас үөрэнээччитигэр. Кини «БОЛОТ» военно-патриотическай кулууп ситиһиилээх иитиллээччитэ. Хабаровскайга, Анапаҕа ыытыллыбыт Бүтүн Арассыыйатааҕы оскуола саастаах оҕолор быыһыыр этэрээттэрин күрэҕэр 2 миэстэни ылбыта, 10 бастыҥ быыһыыр этэрээт иһигэр киирбитэ.
2. Айсен Яковлевка, 11 «Б» кылаас үөрэнээччитигэр. Кини «БОЛОТ» военно-патриотическай кулууп ситиһиилээх иитиллээччитэ. XXII-с Манчаары спартакиадатын мас тардыһыы көрүҥэр кыттыылааҕа, өрөспүүбүлүкэтээҕи мас тардыһыытыгар бастыыр иһин күрэххэ 1 миэстэ хаһаайына.
Егор Шишигин аатынан «Герой Паартата» кини үөрэммит кылааһыгар 206 кабинекка ананна уонна
бастакынан олорор чиэс бэрилиннэ:
1. Диана Филипповаҕа, 9 «Б» кылаас үөрэнээччитигэр. Диана – үөрэх туйгуна, ох саанан ытыыга өрөспүүбүлүкэтээҕи, улуустааҕы күрэхтэр хас да төгүллээх кыайыылааҕа уонна призера.
2. Максим Петровка, 9 «Б» кылаас үөрэнээччитигэр. Максим – Мэҥэ Хаҥалас улууһун чэпчэки атлетикаҕа уонна төрүт ыстаныы көрүҥэр холбоһуктаах хамаандатын чилиэнэ, өрөспүүбүлүкэтээҕи, улуустааҕы күрэхтэр хас да төгүллээх кыайыылааҕа, призера.
Геройдарбыт сырдык ааттара умнуллубакка хорсун быһыылара эдэр ыччакка мэлдьи холобур буолуохтара. Бу паарталар оскуолабыт үөрэнээччилэригэр Ийэ дойдуларын таптыырга, чиэстээхтик сулууспалыырга уонна төрөөбүт буордарын харыстыырга ыҥыраллар.
Снежана Яковлева,
Ф.Г. Охлопков аатынан Майа орто оскуолатын IX «а» кылаас үөрэнээччитэ,
«Түмэн» медиа киин кэрэспэдьиэнэ.
keskil14.ru